O TSXG declara firme a sentenza que obriga á Xunta a restaurar e manter o Pazo de Lourizán en cumprimento do convenio coa Deputación

A Consellería de Medio Ambiente, que deberá informar ao tribunal da execución da sentenza nun prazo de 10 días, non presentou recurso contra a resolución da Sala do Contencioso-Administrativo

A sentenza que condena á Xunta de Galicia a realizar as obras de rehabilitación e mantemento do Pazo de Montero Ríos, en Lourizán, xa é firme. Así vén de decretalo o Tribunal Superior de Xustiza de Galicia despois de que a Consellería de Medio Ambiente, Territorio e Vivenda non presentase recurso contra a sentenza emitida o pasado mes de febreiro pola Sala do Contencioso Administrativo do tribunal galego.

O TSXG non só declara a firmeza da sentenza, senón que outorga un prazo de 10 días para que a Consellería “a leve a puro e debido efecto”, é dicir, cumpra cos contidos da sentenza pola que foi condenada a executar as obrigas derivadas do convenio asinado en 1991 coa Deputación sobre a restauración e mantemento desta xoia do patrimonio civil de Galicia, declarada como Ben de Interese Cultural (BIC).

A sentenza do pasado febreiro estimou o recurso contencioso-administrativo presentado pola Deputación para que o Goberno galego respondera das súas obrigas. A institución provincial optou por levar o asunto aos tribunais despois de que a Xunta de Galicia incumprise o convenio durante os últimos 30 anos e, ademais, non dera resposta ás peticións formuladas.

Por tanto, a Consellería de Medio Ambiente, Territorio e Vivenda está xa condenada en firme “a cumprir coa súa obriga  de efectuar as obras de conservación necesarias para o mantemento da zona nobre da Finca de Lourizán”, atendendo aos termos establecidos nos convenios asinados por ámbalas dúas administracións o 22 de xaneiro de 1991 e o 21 de xaneiro de 2000, tal e como sempre defendeu a Deputación. Ninguna duda hay en los convenios sobre la obligación de la Administración autonómica de efectuar las obras de conservación del Pazo de Lourizán”, afirma o texto legal, “atendiendo a su carácter bilateral, fuente de obligaciones para ambas partes, y dados sus objetivos orientados al interés público, en concreto, de cooperación en materia de investigación agraria orientada al sector forestal, así como en la divulgación de dichas investigaciones y a la formación profesional en el sector”. A sentenza tamén certificou que “está acreditada la existencia de la obligación, a cargo de la Administración autonómica, de efectuar las obras de conservación necesarias para el mantenimiento de la zona noble del actual conjunto, y de que dicha obligación está siendo incumplida, cuando no consta que por parte de la Diputación se hayan incumplido sus obligaciones”.

As peticións da Deputación á Xunta de Galicia para que acometera a rehabilitación integral do Pazo de Lourizán teñen sido unha constante nos últimos anos. En 2016 a institución reclamou publicamente a execución das obras pactadas. En outubro de 2017 remitíuselle  ao Goberno galego unha memoria valorada do servizo provincial de Arquitectura, por importe de 14,2 millóns de euros, para a rehabilitación integral do inmoble. Un mes despois enviouse outra comunicación á Secretaría Xeral de Cultura solicitando que exercera as súas competencias en materia de patrimonio histórico-artístico. Ao non recibirse ningunha resposta a todas estas iniciativas, o Pleno provincial autorizou a interposición do recurso contencioso-administrativo en marzo de 2019. Finalmente, en xuño de 2021 o deputado de Economía e Facenda, Carlos Font, remitiu unha carta ao ex-presidente galego, Alberto Núñez Feijoo, lembrándolle todos estes antecedentes e invitándoo a tramitar a actuación con fondos europeos Next Generation.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.