Treixadura percorrerá Galicia na súa xira ‘Camiño Longo’

A xira comezará o 21 de maio no Teatro Afundación de Vigo. O grupo pechou xa preto de 15 concertos, mais nas vindeiras semanas confirmará novas actuacións

Aínda non está á venda Camiño Longo, o novo traballo de Treixadura, e o grupo xa ten unha xira pechada por toda Galicia. En total e polo momento, preto de 15 concertos nas 4 provincias galegas.

Pero haberá máis, segundo os integrantes de Treixadura “nas vindeiras semanas anunciaremos novas datas, esta será unha das xiras con máis concertos da nosa historia. A pandemia detivo as nosas actuacións e son moitas as citas que temos pendentes en festas, romarías e teatros. O noso Camiño Longo chegará a todos os recunchos de Galicia”.

A xira comezará o vindeiro 21 de maio no Teatro Afundación de Vigo no que será a presentación ao seu público de Camiño Longo, o libro disco que celebra os 30 anos de Treixadura, un percorrido artístico, visual e histórico da dilatada carreira musical de Treixadura, un dos grupos referentes da música galega que recolle a tradición e pon en valor a súa riqueza cultural.

Listaxe de concertos de Treixadura no 2022

21/05/22. Vigo. (Teatro Afundación). Presentación Disco/Libro «Camiño Longo».

03/06/22. Crecente (Po). Festas do Cristo.

24/06/22. A Estrada. Festas Patronais de San Paio.

25/06/22. Narón. Pista Polideportiva de San Xiao.

16/07/22. Meaño (Coa Banda Unión Musical De Meaño). Festa Do Viño De Autor.

25/07/22. O Rosal. (Coa Banda Agrupación Musical Do Rosal).

29/07/22. Moaña. Festival Intercéltico do Morrazo.

30/07/22. A Estrada (Berres). Festas Patronais

04/08/22. Vilalba

13/08/22. Vilanova De Arousa

15/08/22. Cuntis. Festas Patronais.

21/08/22. Betanzos. Festas Patronais.

22/09/22. O Porriño. Festas Do Cristo.

Sobre Treixadura

Treixadura ofrece desde 1990 un espectáculo musical sorprendente a través de dúas concepcións ben arraigadas na tradición galega: o canto e a gaita. O resultado é unha proposta artística que recupera a música tradicional e, á súa vez, representa unha achega á cultura a través das súas composicións e a recuperación de pezas e cancións populares.

Fieis ao compromiso co seu público, tentando elevar a música tradicional ao máximo nivel, Treixadura foi modelando o seu camiño transformando o estilo, sen renunciar ao seu son característico. Ao longo da súa traxectoria son moitas as melodías que rescataron do anonimato e outras tantas creadas para que a cadea de transmisión da música tradicional continúe viva. Un xeito de facer cunha personalidade moi característica, de fíar a raíz musical da nosa cultura co xeito de entender hoxe a música tradicional.

Máis de 30 anos de gravacións e concertos, 8 discos no mercado, unha variada gama de colaboracións discográficas e vida en común, compartindo co público o poder e a forza evocadora, máxica e reconfortante do canto colectivo.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.