Jorquera mantén unha reunión cos traballadores do servizo de vixilancia do Kiosco Alfonso e Durán Loriga, que non cobran desde decembro

O BNG xa levara a situación límite do persoal de Mersant Vixilancia ao Pleno de maio

O portavoz do BNG no Concello, Francisco Jorquera, mantivo esta mañá unha reunión con traballadores do servizo de vixilancia do Kiosco Alfonso e da Casa da Cultura Salvador de Madariaga da Rúa Durán Loriga, nunha situación límite ao non percibiren os seus salarios desde decembro e na práctica ter desaparecido a empresa concesionaria sen que o Goberno Local licitase o novo concurso.

O BNG levou xa este asunto ao Pleno de maio a través dun rogo oral por medio do cal instaba o Goberno Local a que, con independencia do proceso que leve á sinatura dun novo contrato, garantise que os traballadores percibisen a integridade dos seus salarios.

Alén da cuestión salarial, trátase de que o Goberno Local licite canto antes o concurso para os traballadores saíren da “situación extrema de desamparo” na que se achan. Unha licitación que obviamente leve aparellada a subrogación do cadro de persoal da antiga concesionaria.

Jorquera comprometeuse cos traballadores a continuar insistindo no asunto até que o Goberno Local dea plena satisfacción ás súas xustas demandas.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.