Noly (S.D. Castriz) Por @DulceCorcu

Ningunha competición como a Liga da Costa para atopar esas historias ás veces nada correntes en moitos dos xogadores que a conforman. Noly é un deles, un deses grandes de pasado triunfal ao que a vida levou por outros camiños para agora traelo de volta ás orixes, alí onde comezou antes de emprender o vóo non só a categorías superiores, senón a cruzar as fronteiras para gañarse o pan na emigración francesa ao longo de oito anos. De novo no fogar, o pasado fíxose presente volvendo, como cantaba Violeta Parra, aos dezasete. A aquel tempo onde vestía por primeira vez a camisola roxinegra do Castriz, a mesma que vén de defender con doce goles e unha titularidade indiscutible que fixo esquecer o paso de tempo.

Noly nacía no Concello de Santa Comba, fillo pródigo da parroquia de Fontecada na que medrou antes de pisar céspede en San Pedro, nun Castriz de paso efímero porque as súas aptitudes non pasaron desapercibidas para aquel Santa Comba de Terceira División no que acabaría despuntando. Máis adiante, no reunificado Xallas con quen foi campión da Copa da Costa, a mesma que este domingo volverá a competir xa nas filas do mesmo equipo onde comezara a súa andaina futbolística. Porque Noly regresaba aos campos despois de que seu primo Saúl, integrante da plantilla,  lembrase ese pasado de esplendor que adorna a súa traxectoria para que fose rescatado e traído de volta ás raíces.
Consumada a fichaxe, o resto está nas estadísticas, sendo un dos xogadores máis desequilibrantes da pasada Liga e un dos máis goleadores pese aos problemas físicos sufridos. Tan intelixente no campo coma reservado fóra del, de táctica traballada e adquirida nas alturas que antaño desputaba, xogo ofensivo e resolutivo para quen desentraña os partidos con voracidade e compresión lectora, capaz de detectar onde falta ou onde se precisa. Dianteiro tenaz onde a calidade mestura coa entrega, facendo unha combinación non só irresistible, senón tamén insuperable que deixou pegada neste Castriz que celebra a sorte de poder desfrutar outra vez dun talento que sempre foi da casa.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.