O ciclo ‘Soundsystem no Camiño’ mostrará en Lugo o mellor da música reggae do noroeste peninsular

O encontro terá lugar o vindeiro sábado 2 de xullo, entre as 18:00 e as 06:00 no exterior do Pazo de Feiras

A concelleira de Cultura, Turismo e Promoción da Lingua, Maite Ferreiro, presentou o ciclo Soundsystem no Camiño, co que a área de Cultura e o Goberno de Lugo achegan á veciñanza o mellor da música reggae do noroeste peninsular. Maite Ferreiro afirmou que «con este encontro queremos achegar unha mostra dun xénero musical que está a gozar de gran popularidade en todo o mundo, ao mesmo tempo que continuamos a ampliar a oferta cultural da cidade».

A música Reggae ven de ser recoñecida no ano 2018 como Patrimonio Inmaterial da Humanidade pola Unesco. Comparte co Camiño primitivo un valor cultural e social importantísimo. A súa aportación á reflexión internacional sobre cuestións como a inxustiza, a resistencia, o amor e a condición humana revela a forza intelectual, sociopolítica, espiritual e sensual deste elemento do patrimonio cultural.

Neste sentido, a través do Camiño, preténdese facer un encontro de colectivos de reggae/soundsystem en Lugo, cidade milenaria de gran interese patrimonial e histórico na ruta do Camiño Primitivo, orixe do primeiro Itinerario Cultural Europeo (1987) «Camiño de Santiago».

Este encontro busca crear unha alternativa de ocio para a xente da cidade e das persoas que se acheguen a Lugo, dinamizando a contorna e facéndoa máis atractiva e activa, visible e participativa, introducindo novas propostas culturais que están á vangarda noutras partes do estado.

Colectivos participantes Soundsystem no Camiño 2022

PINTEGA SISTEMA DE SON (LUGO)

DUB MONO HI-FI (SANTIAGO DE COMPOSTELA)

ALLANAI CREW (ASTURIAS)

BASSTURIAS COLLECTIVE (ASTURIAS)

ITAL STORM (PONFERRADA, LEÓN)

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.