O sector do software libre reúnese en Vigo achegando solucións en sectores clave

Celébrase o 24 e 25 de xuño en Vigo, onde terán lugar numerosas actividades de entidades e persoas expertas nos eidos do software e hardware libre

A cidade de Vigo será o epicentro do software, hardware e cultura libres os días 24 e 25 de xuño, con motivo da celebración do Congreso esLibre, un dos eventos tecnololóxicos e sobre cultura libre de maior relevancia estatal e internacional.

Será na cidade de Vigo, concretamente no Museo Marco e no espazo de eventos Muta. Neste congreso achegaranse distintas propostas e solucións sobre cuestións moi relevantes para a cidadanía, como son o aforro na factura enerxética, a loita contra as pandemias, o combate contra software malicioso, incentivar o interese pola programación na escola e un longo etcétera.

As entidades anfitrionas e que colaboran na organización co equipo de coordinación a nivel estatal son o Grupo de Amigos de Linux de Pontevedra (GALPon) e a Asociación de Empresas Galegas de Software Libre (Agasol). O evento desenvolverase en formato presencial, pero tamén estará dispoñible en liña para as persoas que non poidan asistir a Vigo.

Optimizar a factura enerxética

Entre as múltiples temáticas que se abordarán destaca unha de imperiosa actualidade: como optimizar o aforro enerxético. Isto pódese conseguir a través do proxecto FreeDs, que une un hardware e software libres para xestionar os excedentes enerxéticos nun determinado momento e derivalos para outros usos.

Actualmente conta con case 2.000 persoas usuarias que, a través dun grupo de mensaxería en Telegram, comparten consellos e asesoran sobre a montaxe e uso deste sistema, que apenas ten un custo de 50 euros.

Hai fogares que grazas a este proxecto lograron rebaixas de ata o 100% do custo variable da factura, reducindo facturas mensuais de 400 a só 8 euros. Porén, FreeDs dedícase a optimizar, é dicir, para lograr o aforro é preciso contar coa instalación e o consumo de fontes de enerxía alternativas aos combustibles fósiles, como a enerxía solar.

Loita contra a covid-19

A expansión global da covid-19 puxo de manifesto a utilidade da tecnoloxía para controlar os contactos de persoas infectadas. Un exemplo son as aplicacións de rastrexo implantadas por numerosos países en todo o mundo, entre eles España.

No noso país, a aplicación oficial foi desenvolvida e lanzada con software libre e facilitando a interoperatividade con outros sistemas, como amosan estes datos da Comisión Europea. O experto Alexander Sander, da Fundación Europea de Software Librefalará sobre o impacto que esta tecnoloxía na loita contra a pandemia.

A propia Fundación considera necesario que calquera aplicación deste tipo sexa libre e utilice software libre, o cal permite protexer os dereitos fundamentais da cidadanía achegando seguridade e transparencia, que non poden garantir outras solucións privativas de grandes compañías tecnolóxicas.

Outras temáticas relevantes

Esta edición de esLibre inclúe debates e conferencias sobre a situación actual do movemento do software libre en Galicia e outras comunidades como Asturias. Precisamentre a galega é unha das autonomías onde hai un sector con empresas referentes e de gran proxección internacional.

As actividades do congreso tamén se centrarán en achegar ferramentas para combater o software malicioso na utilización de sistemas libres como Linux ou como a plataforma Arduino, que incentiva o interese e a práctica en programación por parte do estudantado de ensino secundaria e bacharelato.

O software libre é transversal a todos os sectores da economía e iso tamén aplica á construción, unha das actividades con maior peso na economía galega e española que, pese a iso, está moi pouco dixitalizada. Unha das charlas amosará as carencias e o que queda por facer neste eido.

Outra das conferencias máis esperadas é a que protagonizará Pietro Marini, da compañía Nextcloud, unha plataforma de código aberto que permite ás súas persoas usuarias ter o control sobre os seus propios datos, subidos á súa propia nube particular.

Este sistema estase utilizando en produción en centenares de miles de organizacións en todo o mundo, algunhas delas con bases de usuarios masivas.

Horarios e actividades

Desde a propia web do congreso pódese acceder ao detalle de horarios e actividades programadas, incorporando unha ficha de cada unha delas, con descrición e ata contactos das persoas relatoras.

A asistencia é libre e gratuíta pero, por cuestións de aforo, é preciso rexistrarse previamente no seguinte enlace.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.