Podemos Galicia urxe ás institucións a seguir avanzando nos dereitos das persoas LGTBIQ+

Verónica Hermida: «Cando falamos de dereitos en materia LGTBIQ+ no fondo estamos a falar das condicións materiais que determinan a vida das persoas do colectivo»

Podemos Galicia vén de informar da presentación de mocións municipais nos concellos para pedir a súa implicación activa na conquista de dereitos das persoas LGTBIQ+, algo que pasa principalmente pola aprobación da Lei LGTBIQ+ e TRANS por parte do Goberno do Estado á maior brevidade.

Co motivo do mes do Orgullo, Podemos sinala que é preciso poñer en relevo o valor dos avances acadados durante décadas de loita do colectivo LGTBIQ+ e reivindica que este debe ser un «orgullo de dereitos» co impulso definitivo á Lei LGTBIQ+ e TRANS que signifique o comezo do pago da débeda que temos co colectivo.

«Cando falamos de dereitos en materia LGTBIQ+ no fondo estamos a falar das condicións materiais que determinan a vida das persoas do colectivo», sinala a voceira de Podemos Galicia, Verónica Hermida, quen continúa afirmando que «a aprobación desta lei é fundamental para garantir o acceso á vivenda ou a un traballo das persoas LGTBIQ+ en condicións de igualdade co resto da sociedade. Non son cuestións menores nin secundarias, senón que son dereitos humanos».

Por este motivo, a formación busca a implicación e o posicionamento dos concellos para que a lei se tramite con celeridade, posto que «non podemos seguir negando a igualdade de dereitos do colectivo» e cualifica a futura aprobación da lei como «histórica» e considera que «dará continuidade ao camiño que se iniciou coa aprobación do matrimonio igualitario, tras a parálise nos avances que supuxo o goberno do Partido Popular a partir de 2011».

Hermida traslada ademais o «compromiso de Podemos cos avances en materia de igualdade e LGTBIQ+ que manifestan as políticas do Ministerio de Igualdade e que se reflicten no esforzo para sacar adiante unha lei tan necesaria» e anima á celebración «dun orgullo máis reivindicativo que nunca que poña os dereitos do colectivo no centro».

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.