Sar Xoán 2022, un solsticio cheo de música, cultura, feira de barrio e actividades no Sar

O Espazo Veciñal de Sar recupera, despois da COVID, o Sar Xoán, que comezará ás 17 horas do xoves 23 cunha feira de barrio con máis de 15 postos, e cun cartaz cheo de propostas para unha xornada na que recibir o verán nas rúa

O xoves 23 as actividades do Sar Xoán darán inicio ás 17 horas coa Feira de Barrio, que ocupará a máis de 15 postos ataviados das correspondentes carpas ao longo das rúas do Sar e Ponte do Sar. Participará cos seus stands establecementos e iniciativas como os muralistas Cestola na Cachola, a Libraría Lila de Lilith, o xornal O Salto, A Tenda de Mari, o centro social CSA do Sar, a xoguetería o Escondi T, a libraría Aenea, o alumnado do IES Sar, a ilustradora Gloría Pavía, a gravadora Alma López, a xoieira Parachute, o escultor Rubén Alvseg, as ilustracións de Feitizo, Maruxa e Lourdes, a floristería Louzao, os ceramistas Xaime Piñeiro Borrajo e VL, o lutier A Grileira ou a iniciativa Felix Felici. Finalmente, terá presenza a campaña Regularización Xa!, en defensa dos dereitos das persoas migrantes, á que a asociación veciñal pide sumarse, ao berro de que ningún ser humano é ilegal. Máis solidariedade para rematar este longo inverno.

Respecto ás propostas musicais, o músico Xavier Mugardos, actuará en ás 18:00 horas na praza dos Pexigos, a música A Tecla Negra percorrerá o barrio coa súa proposta cultural e os grupos Os enxebres de San Lázaro e Rabeira andarán en pasarrúas polo barrio dende as 19:30 horas, con paradas nos bares colaboradores DA-CA, O Sendeiro, Bar Chantadina e Bar Mosquera. Dentro destas magníficas propostas as sardiñas irán ao cargo dos establecementos colaboradores, e o Bar Chantadina, Bar Mosquera e O Sendeiro servirán ben sardiñas, ben tapas en base a sardiñas dende as 19:00 horas.

Logo das 21:45 horas actuará na rúa Ponte do Sar, onde se localizará a carpa do Espazo Veciñal, o grupo Balura, a Agrupación Folclórica Colexiata do Sar, e o grupo Reviravolta, que animarán as cacharelas.

Así mesmo, a asociación Abeiratúa fará unha actividade de pilates no seu local dende as 17:30 horas, e dende esa mesma hora o ximnasio Avalon realizará actividades para todas as idades na rúa Ponte do Sar. A libraría Aenea realizará ás 18:30 horas unha lectura de contos en familia, e o Fotoclube Sar unha proxección de fotografías. Finalmente, a partir das 17:30 horas, o taller mecánico Garage Days realizará na mesma rúa un obradoiro de asistencia básica en estrada.

A asociación recórdalle ás veciñas e veciños que a rúa do Sar e a rúa Ponte do Sar (dende o cruce de Diego Bernal á ponte) permanecerán cortadas ao tráfico dende as 15 horas ata a madrugada, e que resulta imprescindíbel que queden despexados os aparcadoiros para poder celebrar a feira e a cacharela. Garantirase o acceso aos garaxes e ao aparcadoiro público do barrio. Acceso que se roga sexa usado con moderación debido ao desenvolvemento da festa.

A xornada finalizará coa veciñanza ao redor da Cacharela que se terá lugar na rúa Ponte do Sar.