Noelia Otero alerta dos “recortes inxustificados” de docentes na educación pública galega

Directivos de distintos institutos galegos presentan a súa dimisión como medida de protesta pola redución de docentes decidida dende a Consellería de Educación

A parlamentaria socialista Noelia Otero Lago vén de presentar unha batería de iniciativas no Parlamento galego para instar á Xunta que reverta os recortes de docentes que están sufrindo institutos de toda Galicia. Esta decisión “absolutamente inxustificable”, lembra a socialista, “afecta directamente, tal e como denuncian as distintas comunidades educativas, ao reparto digno do traballo, as gardas, a educación inclusiva e a calidade de ensinanza pública”.

A Xunta de Galicia con estes recortes de profesorado avoca a unha situación límite aos centros educativos galegos, que os incapacita de ofertar materias optativas, garantir clases de reforzo ou impartir actividades complementarias en bibliotecas ou extraescolares. O Grupo Socialista amosa todo o seu apoio ás denuncias de reivindicación dos distintos equipos directivos de institutos arredor de toda a comunidade onde presentaron a súa dimisión en bloque como medida de protesta ante estes “inadmisibles recortes”.

Otero Lago insta á Consellería a atender as demandas dos IES e axustar os cadros de persoal docente ás necesidades contempladas nas peticións trasladadas para o curso 2022/2023 polos equipos directivos. E alerta, outro ano máis, esta “política nefasta de recortes de investimento en recursos humanos e económicos no eido do ensino que deixan aos centros e ás e aos seus profesionais nunha situación de absoluta precariedade”.

Arredor disto, a voceira de educación do PSdeG lembra ca redución de alumnado nas aulas permite “unha mellor atención individualizada e uns resultados positivos en canto ao rendemento escolar”, sinala Otero, ademais de facilitar a detección máis precoz de necesidades especiais ou mellorar o rendemento interno para acadar os obxectivos programados, a relación coas familias ou ter máis tempo para as tarefas burocráticas.

Na iniciativa recóllense exemplos dramáticos coma o do IES Punta Candieira e o de IES A Sangriña, que, como lembra Otero, nos últimos anos acumulan un recorte de 11 docentes no primeiro caso e 13 no segundo. Este “desmantelamento da educación pública” afecta a un gran número de institutos da comunidade e causa unha gran preocupación entre as familias do alumnado.

A deputada conclue con que son “recortes absolutamente inxustificables”, a pesar disto, a política de recortes do PP en Educación son continuas, e a Consellería “camiña polo tanto na dirección contraria á consecución dunha redución progresiva de rateos e dunha educación pública de calidade” lembra ademais que estamos nun momento idóneo para que a administración inicie o diálogo e estudo das posibilidades sobre unha das reivindicacións máis relevantes da comunidade.

Deja una respuesta

Tu dirección de correo electrónico no será publicada.

Este sitio usa Akismet para reducir el spam. Aprende cómo se procesan los datos de tus comentarios.