Comezan as obras de substitución da pasarela e as ramplas de madeira do paseo da praia de Razo

O Concello de Carballo realizará un investimento de 164.064,57 euros  

O alcalde, Evencio Ferrero, e o concelleiro de Mobilidade, Juan Seoane, achegáronse ata Razo coincidindo co inicio dos traballos de substitución da pasarela e das ramplas de madeira do paseo da praia. As obras foron adxudicadas en xullo á empresa Jardinería Arce por 164.064,57 euros, e agardouse ata o remate da temporada de praias para poñelas en marcha coa finalidade de non afectar ao desenvolvemento das actividades estivais nun dos principais enclaves turísticos do concello.

A empresa adxudicataria dispón de catro meses de prazo para rematar a actuación. A pasarela, que ten algo máis de 600 metros de lonxitude, foi construída entre os anos 2003 e 2005, e case vinte anos despois precisaba unha reforma integral. As obras consisten na demolición e levantado das estruturas actuais e a limpeza da zona, a reposición do borde de formigón, a instalación da nova pasarela de madeira de pino tratada, así coma das ramplas de accesibilidade. O proxecto tamén prevé o traslado das columnas de alumeado público, bandeirolas e megafonía que invaden a zona de paso e a ampliación dos cubre-contedores.

Os trámites para acometer a substitución da pasarela comezaron xa no ano 2021, coa elaboración do proxecto no mes de setembro e a súa remisión aos organismos competentes ao mes seguinte. A tardanza das administracións estatal e autonómica en autorizar as obras foi a principal causa da demora. A autorización da Demarcación de Costas do Estado chegou ao Concello de Carballo en marzo deste ano e a da Consellería de Medio Ambiente da Xunta, o 18 de maio. O prazo para a presentación de ofertas por parte das empresas rematou o 31 de maio, o 16 de xuño formulouse por parte da mesa de contratación a proposta de adxudicación, que se formalizou o 18 de xullo en Xunta de Goberno.

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.