A Deputación da Coruña pon en marcha o II Circuíto de Cultura en Igualdade

O programa, que chegará durante os próximos catro meses a 21 concellos coruñeses e aos dous centros infantís de titularidade provincial, inclúe nove propostas de teatro, música e contacontos nos que se traballa a diversidade sexual, a sensibilización en materia de igualdade de xénero e a prevención da violencia machista

A segunda edición do Circuíto Cultura en Igualdade, do departamento de Igualdade da Deputación da Coruña, arrancou onte na Casa da Cultura de San Sadurniño, onde a compañía Pérez&Fernández representou a versión teatral da novela de María Solar «Os nenos da varíola».

O programa, que chegará durante os próximos catro meses a 21 concellos coruñeses e aos dous centros infantís de titularidade provincial, inclúe nove propostas de teatro, música e contacontos nos que se traballa a diversidade sexual, a sensibilización en materia de igualdade de xénero e a prevención da violencia machista.

«Na diagnose de igualdade feita polo noso departamento», explica a deputada María Muíño, «propuxémonos que o Circuíto siga apostando por ferramentas que propicien un cambio de valores para o fomento dunha sociedade igualitaria inclusiva e diversa». «Entre as medidas de actuación que se recolleron, logo dun proxecto participativo que durou meses, están a promoción e posta en marcha de actividades de promoción da igualdade de xénero e de respecto á diversidade, a creación dun catálogo de recursos e tamén o mantemento de apoio a proxectos culturais que inclúan a perspectiva de xénero».

Os espectáculos están destinados a todos os grupos de idade e traballan temáticas e tramas que van desde a lembranza das casas refuxio e as mulleres libertarias («As Mapoulas», de Laboratorio Escénico) até a viaxe de Isabel Zendal («O nenos da varíola», de Pérez&Fernández), pasando polo tratamento da violencia dixital («Miss Docet», de Compañía Eléctrica), o reencontro de tres amigas («Feminíssimas», de De Ste Xeito Producciones), a vida da pedagoga María Barbeito («As alumnas», de Culturactiva Producións), os problemas de conciliación («4.0», de Sue Moreno), as mulleres do mar como protagonistas («Asdomare», de Rilo & Penadique), a música de tradición oral feita por mulleres («Ris Ras», de Baobab Teatro) e a influencia das redes sociais, o «selfie» e o «sexting» na creación da propia identidade («Amantis», de Rebordelos).

Ademais de San Sadurniño, o II Circuíto Cultura en Igualdade fará parada, desde este mes ata febreiro de 2023, en Rianxo, A Laracha, A Pobra, Mañón, As Pontes, Vimianzo, Val Do Dubra, Rois, Trazo, Boiro, Moeche, Malpica, Boimorto, Coirós, Dodro, Brión, Arzúa, Camariñas, Pontedeume, o Centro de día de menores de Ferrol e o Fogar Infantil Emilio Romay, da Coruña.

Programa

«OS NENOS DA VARÍOLA», DE PÉREZ&FERNÁNDEZ

·       5/10, Casa da Cultura de San Sadurniño

·       9/12, Rianxo

 

«MISS DOCET», DE COMPAÑÍA ELÉCTRICA

·       23/10 (20 horas), Teatro Elma, A Pobra

·       2/12, A Laracha

·       3/12, Betanzos

·       4/02/2023, Mañón

 

«AS MAPOULAS», DE LABORATORIO ESCÉNICO

·       15/10 (20 horas), Auditorio Municipal Cine Alovi, As Pontes

·       23/11, Vimianzo

 

«4.0», DE SUE MORENO

·       15/10 (18.30 horas), Patio CEPI Val Do Dubra, Val do Dubra

·       12/11, Rois

·       24/11, Trazo

 

«AS ALUMNAS», DE CULTURACTIVA PRODUCIÓNS

·       5/11, Boiro

·       27/11, Moeche

·       3/12, Malpica

 

«ASDOMARE», DE RILO & PENADIQUE

·       23/11, Boimorto

·       24/11, Coirós

·       25/11, Dodro

 

«FEMINÍSSIMAS», DE DE STE XEITO PRODUCCIONES

·       16/12, Brión

·       17/12, Arzúa

 

«RIS RAS», DE BAOBAB TEATRO

·       3/02/2023, Centro de día de menores de Ferrol