Investigadores do CSIC desenvolverán un estudo preliminar do xacemento do castro de Rueta en Cervo
A Vicepresidencia da Deputación de Lugo cofinanciará un estudo preliminar do castro de Rueta, en Cervo, impulsado por Mariña Patrimonio
A través dunha achega de 5.000 euros, a área de Cultura colaborará no financiamento do proxecto que desenvolverán investigadores do Consejo Superior de Investigacións Científicas (CSIC) e que ten como obxectivo evaluar o estado de conservación do xacemento e a súa idoneidade para actuacións máis ambiciosas nun futuro próximo.
A vicepresidenta da Deputación de Lugo, Maite Ferreiro, valorou “o paso adiante que dá Mariña Patrimonio en relación con este xacemento, que xa viña divulgando a través de diferentes iniciativas”, e sinalou que “este tipo de proxectos demostran a importancia dun tecido cultural e social sólido, que desde a Vicepresidencia da Deputación tratamos de reforzar a través de distintas liñas de axuda”.
A responsábel de Cultura destacou ademais “a traxectoria de Mariña Patrimonio no coidado do territorio e na divulgación do patrimonio, con charlas, rutas e outras actividades que amplían o coñecemento e a sensibilidade da cidadanía respecto destes recursos, estimulando o interese pola conservación dos bens patrimoniais”.
Neste sentido, paralelamente ao traballo científico, desenvolveranse varias actividades divulgativas, entre as que cabe citar a visita guiada ao castro do mércores, na que participará alumnado dos centros educativos do municipio. Ademais, ese mesmo día, ás 16.30 horas, haberá unha xornada de portas abertas para o público en xeral.
Foto portada: Mariña Patrimonio
