O BNG require a mellora do funcionamento do INTECMAR despois de outra xornada de perdas de miles de euros na ría de Muros e Noia
A formación nacionalista incide na posta en marcha do seguro colectivo para as perdas no sector marisqueiro no pleno municipal de Noia e no Parlamento galego
O portavoz do BNG de Noia, Ricardo Suárez, vén de rexistrar unha iniciativa no pleno coa intención de instar á Consellería do Mar a “dotar dos suficientes medios económicos e humanos ao INTECMAR para que manteña unha actividade adecuada ás necesidades do sector marisqueiro, dando os resultados das análises antes das horas de traballo para que non se interrompa a posibilidade de saír ao mar nin se xeren perdas de miles de euros ao sector”.
A formación nacionalista presenta esta iniciativa despois de que este martes, cando a actividade marisqueira na ría de Muros e Noia leva case un mes de paro, o sector marisqueiro non tivera a oportunidade de saír a traballar porque o INTECMAR non obtivo os resultados das mostras para calcular a presenza de toxina ata a noite, cando estas mostras foran entregadas pola confraría na xornada previa, a do luns, ás 10 horas da mañá.
Unha situación ante a que a confraría San Bartolomeu de Noia anunciou a presentación dunha queixa formal. O portavoz do BNG en Noia afirmou que se trata “dunha situación que se repite no tempo e que xera perdas de miles de euros ás mariscadoras e mariscadores”, polo que Suárez requiriu “solucións inmediatas para que o INTECMAR funcione de forma que cubra as necesidades do sector”.
Ademais, o grupo nacionalista tamén pretende que a Corporación inste á Consellería do Mar a “poñer en marcha o seguro colectivo para cubrir perdas económicas no sector marisqueiro”. Unha cuestión que, segundo asegura o grupo, “xa fora anunciada pola conselleira do Mar, Rosa Quintana, na súa comparecencia para explicar os orzamentos para o ano 2022”.
Neste sentido, a deputada do BNG, Rosana Pérez, tamén presentou unha batería de preguntas no Parlamento galego dirixidas á Consellería do Mar, incidindo en “que xestións levou ou está a levar a cabo a Xunta para impulsar o seguro colectivo para cubrir perdas económicas no sector marisqueiro que anunciou hai un ano”, e en “cando ten previsto que se poña en funcionamento”. Pérez acentuou que “a situación que se está a vivir este ano, especialmente grave, require de maior axilidade aínda na súa contratación”.
