Os taxistas de Lugo colaborarán para previr casos de violencia machista no San Froilán
Maite Ferreiro presentou xunto con integrantes da Asociación de Taxistas un protocolo contra a violencia machista para o San Froilán
A edil de Cultura, Maite Ferreiro, anunciou que, xunto coa instalación de un Punto Violeta durante as noites de San Froilán «contaremos coa colaboración das e dos taxistas para evitar e atender casos de violencia machista» afirmou Maite Ferreiro e engadiu «o obxectivo é contribuir a previr situacións de acoso ou violencia machista e atender a posibles vítimas».
«Sabemos que, no sector do taxi xa se ven prestando atención para evitar agresións por iso queremos contar coa súa colaboración durante as festas» explicou a edil de Cultura.
A área de Cultura habilita puntos violeta para que todas as persoas que o desexen poidan achegarse a recibir información ou comunicar calquera tipo de situación de acoso sexual. Prestará atención os días 4, 6, 7, 8 e 11 de outubro entre as 21:00 e as 02:00.
«As violencias sexistas son moi variadas en relación aos ámbitos e espazos nos que se producen pero sabemos que momentos como as noites do San Froilán son especialmente proclives a este tipo de situacións», sinalou Maite Ferreiro e concluíu «debemos concienciar e sensibilizar para modificar e erradicar actitudes e comportamentos sexistas nos espazos de ocio, creando así espazos libres de agresións onde todos es todas poidamos gozar das festas libremente e con tranquilidade».
