O PP augura que o 2023 será “outro ano perdido para Castroverde” porque o orzamento municipal “é pobre e non responde ás necesidades do concello”

O portavoz popular, Rubén Otero, destaca que o capítulo de investimentos reais non chega aos 386.000 euros

Un ano máis, no 2023 o Concello de Castroverde, por obra do seu alcalde, José Marías Arias (PSOE),  terá un orzamento que está moi lonxe de responder ás necesidades do municipio. O orzamento municipal, aprobado cos únicos votos do PSOE, é continuista, en tanto que pobre, carente de imaxinación e falto de previsión inversora. Así o entende o portavoz popular, Rubén Otero, que lamenta que o capítulo de investimentos reais só estea dotado con 385.419,76 euros (desta cantidade só 27.000 € son de recursos propios), dentro do importe total do orzamento, que é de 2,9 millóns de euros.

Otero sinala: “Castroverde non merece un castigo así. O socialista Arias perdeu unha boa oportunidade de rematar o mandato presentando unhas contas para o 2023 ambiciosas, capaces de dar resposta ás necesidades de promoción do Concello, de apoio á industria e de fomento do emprego”.

O portavoz popular sinala que o goberno municipal de Castroverde fía os investimentos ás aportacións da Xunta e da Deputación provincial. En resumo, en palabras de Otero, “máis do mesmo e, polo tanto, veremos como o 2023 se converte noutro ano perdido para Castroverde”.