Continúa o apoio masivo na Mariña á ILP en defensa da atención primaria
O BNG recolleu sinaturas hoxe en Ribadeo, onde se repiten os problemas deste verán e mañá estarán desde ás 10 en Foz no Centro de Saúde
O apoio á Iniciativa Lexisativa Popular en defensa da atención primaria que promoven SOS Sanidade Pública, a Plataforma en Defensa da Sanidade Pública da Mariña, e outros colectivos sociais, continúa na comarca, concello a concello, e os problemas repítense nos centros de saúde, onde a falta de persoal facultativo lonxe de solucionarse acentúase día a día e servizos tan importantes coma o de pediatría están practicamente en cadro, e sen esquecer tamén a situación que atravesa atención hospitalaria, onde os m2 de ampliación non se traducen en máis servizos.
No caso de Ribadeo durante o último ano e medio nunca estivo o cadro médico ao completo, sendo habitual a falta dun tercio do mesmo e nos últimos días do ano repetiuse a situación vivida no verán, de estar só 3 médicas de mañá. A todo esto hai que sumarlle que desde a xubilación da matrona no mes de decembro só se cubre o servizo 1 ou 2 días á semana.
Mobilización o 19 de xaneiro
Ao igual que viñeron facendo nas demais localidades da comarca, o BNG recolleu hoxe sinaturas en Ribadeo, convidando tamén á cidadanía a asistir á manifestación que a Plataforma Sanitaria convoca en Burela, con saída do Hospital ás 20:00 o xoves 19 de xaneiro, en contra do desmantelamento da sanidade pública. A esta recollida en Ribadeo asistiron membros do goberno municipal e o deputado Daniel Castro, que recordou as numerosas iniciativa levadas polo BNG ao Parlamento diante dos graves problemas que atravesa a sanidade pública no país, e especialmente na comarca agravándose nos últimos anos desde que o Partido Popular eliminou a Área Sanitaria da Mariña. “As mariñás e mariñaos temos moitos motivos para saír á rúa, para defender o noso ben mais prezado que o PP quere desmantelar: a sanidade pública” afirmou Castro.
O xoves 5, ás 10:00, recollida de sinaturas en Foz
Este xoves 5 de xaneiro recollerán sinaturas en Foz, no Centro de Saúde desde as 10:00, onde neste Nadal a Consellería de Sanidade deixou sen cobertura médica ás veciñas e veciños de Foz, feito que foi denunciado polo BNG respondendo o Sergas con total improvisación inventándose unha quenda de media xornada sen anuncio público nin coñecerse o horario desa prestación.
