Agromuralla: “Os prezos do leite de cara á renovación de contratos teñen que manterse ou subir”

A asociación de gandeiros e gandeiras considera “intolerables” as ameazas das industrias de baixadas no prezo pagado actualmente ás explotacións porque “os custos de produción non baixaron”

A asociación de gandeiras e gandeiros Agromuralla pide aos produtores de leite “que non se deixen influenciar pola estratexia premeditada que están a levar a cabo as industrias para tentar revisar á baixa os contratos que rematan o vindeiro 31 de marzo”.

Agromuralla defende que “os prezos para este ano teñen que manterse ou mesmo subir, dado que os custos de produción seguen a aumentar”. “O gasóleo, a luz, os pensos e os fertilizantes continúan polas nubes”, aseguran.

A iso engádense o incremento nos custos laborais da man de obra, como consecuencia da subida do salario mínimo interprofesional, e aspectos fiscais derivados da rebaixa do IVE. “Os produtores non estamos a cobrar o IVE pola venda do noso leite; sen embargo, temos que seguir pagando o 10% ou o 21% de IVE polos insumos e servizos que consumimos, o que provocará este ano un desaxuste contable nas explotacións”, denuncian.

Ademais, argumenta a asociación de gandeiros, “a produción segue sendo similar á de 2022, que rematou cun descenso de produción do 2% no conxunto de España”, polo que “a actual coxuntura de mercado non xustifica unha baixada de prezos, senón o seu mantemento ou revalorización en consonancia coas actuais taxas de inflacción”, di.

Ameazas intolerables

No escenario actual, previo á renovación dos contratos de primavera, Agromuralla ve “intolerables” as “ameazas” das empresas que recollen o leite cara aos gandeiros que o producen e advirten ás industrias que están “tirando pedras sobre o seu propio tellado”.

“Segue habendo falta de leite e se os prezos baixasen a produción volvería caer en picado”, aseguran, polo que se desencadearía unha situación de “desabastecemento do mercado” no que habería empresas que se quedasen sen subministro. “O leite sería nese caso para as industrias que pagasen máis por el”, argumentan. Do mesmo xeito, din, unha baixada en orixe provocaría un descenso de valor en toda a cadea, o que tamén prexudicaría ás industrias.

Por iso, desde Agromuralla piden ás empresas “que non traten de meter medo con globos sonda que son inaceptables”, e aos gandeiros “que non se deixen influenciar”, incidindo na capacidade de negociación que contempla a lei a favor do produtor.

Incumprimento da lei na presentación de ofertas por parte das empresas

Agromuralla lembra tamén ás industrias que “están incumprindo a lei” porque “teñen obriga de facer chegar ao produtor a súa oferta con alomenos dous meses de antelación para dar marxe ao gandeiro a negociar con outras empresas”, un prazo que as industrias non están a cumprir en canto aos contratos que vencen en marzo.

“Os gandeiros tiñamos que ter xa a estas alturas enriba da mesa as distintas ofertas das empresas pero estase a producir un incumprimento manifesto que é susceptible de ser denunciado ante a AICA”, advirte Agromuralla.

Recomendan contratos a curto prazo para que o leite non quede “atado”

Agromuralla pide “calma” aos gandeiros á hora de estudar as distintas ofertas porque “hai prazo para asinar ata a finalización de contrato e non convén apurarse á hora de tomar a decisión”, recomendando “esgotar os prazos”.

Neste sentido, explican desde a asociación de gandeiros que logo da modificación do chamado Paquete Lácteo, producida o ano pasado, o produtor non ten obriga de rexeitar a oferta da industria, cando antes tiña un prazo de 15 días para facelo por escrito ou senón entendíase renovado automaticamente o contrato. Agora, sen embargo, ocorre xustamente o contrario, é dicir, se o gandeiro non se pronuncia a oferta enténdese como non aceptada.

Agromuralla é ademais partidaria neste momento de que os seus socios asinen contratos a curto prazo “para que o leite non quede atado e haxa maior competencia entre as industrias”.

“O problema que houbo o ano pasado é que o leite en Galicia estaba maioritariamente vinculado a contratos a un ano, o que fixo que os prezos se mantivesen máis baixos que noutras comunidades autónomas e que industrias de fóra que tiñan falta de leite non puideran vir en busca del a Galicia porque non había dispoñibilidade na entrega por parte das granxas”, argumentan.