O encontro será o vindeiro venres, 5 de decembre, no pazo de San Roque, con acceso libre ata completar capacidade.
O vindeiro venres, 5 de decembro, preséntase o Foro Galicia Crea. Será no compostelán pazo de San Roque dentro da primeira xornada que se celebra co gallo da conmemoración do Sétimo Centenario de creación literaria en galego.
O Foro Galicia Crea xorde da iniciativa dun grupo diverso de profesionais dos eidos da ciencia, a tecnoloxía e a cultura que promove a creatividade e o pensamento libre fomentando espazos de traballo e debate dende Galicia, en interacción coa cultura global. Ademais de desenvolver foros de reflexión, Galicia Crea porá en marcha un Plan de Mentorización para a orientación da xente máis nova.
Os fundadores de Galicia Crea son, entre outros, a inmunóloga África González, a produtora audiovisual Zaza Ceballos, o forense Ángel Carracedo, o físico Jorge Mira, a enxeñeira da telecomunicación Edita de Lorenzo, a editora Laura Rodríguez Herrera, a administrativista Teresa Carballeira, o xornalista Alfonso Cabaleiro, a xurista e secretaria xeral da Universidade de Vigo María José Bravo ou o empresario e consultor Pati Blanco, ademais do catedrático de Literatura Comparada José María Paz Gago, coordinador da xornada xunto a profesora Gema Vallín.
Sete séculos de creación poética en galego
O vindeiro venres terá lugar a cita cultural arredor das primeiras creacións literarias en galego, que se remontan a finais do século XII. As cantigas galego-portuguesas estenderanse por toda a Península nos dous séculos seguintes, acadando o seu máximo esplendor na época do monarca e trobador don Dinis de Portugal, que foi quen de converter unha lingua esencialmente literaria, o romance galego-portugués, na lingua oficial do Reino de Portugal. O ano do pasamento de don Dinis de Portugal, 1325, hai sete séculos, marca a efeméride da consolidación da creación poética en lingua galega.
A xornada será inaugurada por Zaza Ceballos, presidenta de Galicia Crea, o secretario xeral da Lingua, Valentín García e o director xeral de Cultura, Anxo Lorenzo.
A catedrática emérita da Universidade de Santiago Mercedes Brea impartirá a conferencia inaugural e a de clausura correrá a cargo do profesor de Universidade de Porto e membro da Academia das Ciências de Lisboa José Augusto de Sottomayor Pizarro, máximo especialista na figura e na obra do Rei don Dinis de Portugal.
O programa complétase cos relatorios de Elvira Fidalgo Francisco (USC), Santiago Gutiérrez García (USC) e Gema Vallín Blanco (UDC). Por outra banda, os profesores da Universidade da Coruña Manuel Ferreiro e Leticia Eirín presentarán Universo Cantigas (https://universocantigas.gal/), unha edición integral de todo o corpus das cantigas galego-portuguesas, tanto en formato dixital como físico.
Ao final de mañá terá lugar unha mesa redonda sobre o presente e o futuro da creación poética na Galicia de hoxe na que intervirán Yolanda Castaño, Adrián Maceda e Helena Salgueiro. Dous espectáculos musicais baseados nas cantigas medievais, a cargo dos grupos Alana e Manseliña, completarán o programa.
A cita cultural, organizada polo Foro Galicia Crea, conta coa colaboración da Secretaría Xeral da Lingua, da Consellería de Cultura, Lingua e Xuventude da Xunta de Galicia.
