Cunha oferta reducida e cun espírito recuperado, A Bela Auria volveu a celebrar os anos 20 do século pasado
Decenas de nenos e os seus pais tiveron oportunidade de gozar dunha xornada diferente, que daba comezo ás 12:00 da mañá cos contos de Uxía Morán.
A actriz ourensá convidou ás familias que se achegaron ata o Pazo de Trasalba a participar activamente nas súas contadas converténdose en actores por un día.
A continuación, Irma Fernández devolveunos aos cafés-cantantes de comezos de século, grazas ao seu piano e ao talento inmortal de Charles Chaplin.
Foi o cinema mudo un descubrimento para os máis cativos; riron, soñaron e gozaron cunha peza audiovisual de máis de cen anos: ‘Vida de Can’.
A Bela Auria Pequeniña despídese ata o vindeiro ano, no que seguirá homenaxeando á xeración Nós, no mes da publicación da súa revista.