A Asociación de Concellos da Vía Verde Compostela, Tambre, Lengüelle quere achegar a Vía ás persoas participantes e público desta cita deportiva
A Asociación de Concellos da Vía Verde Compostela, Tambre, Lengüelle continúa desenvolvendo accións de promoción para achegar a Vía a novos públicos neste mes de decembro. Nesta ocasión a Asociación escolleu o marco da San Silvestre de Ordes para a súa difusión mediante diferentes soportes publicitarios que poderán atoparse ao longo do percorrido da carreira.
Entre eles destaca o arco de meta para visibilizar a Vía Verde á chegada dos corredores, buscando achegarse non só a participantes, senón tamén ao público asistente da carreira, dando a coñecer as opcións de entretemento activo para todos os públicos.
Segundo a Asociación de Concellos da Vía Verde Compostela, Tambre, Lengüelle, «cada vez son máis as persoas que coñecen a Vía Verde pero queremos promovela entre un maior público. A San Silvestre de Ordes é unha excelente oportunidade para achegarnos ás persoas que gozan de practicar deporte e exercicio físico, pois a Vía é un escenario perfecto para elas, xa sexa correndo, andando ou en bicicleta. Cada un pode escoller o traxecto ou percorrido a realizar e desenvolvelo do xeito que prefira, as opcións de percorrer a Vía son múltiples«.
En total serán 354 persoas as que participen nesta edición da San Silvestre de Ordes, que ano tras ano configurouse como unha cita obrigada para os amantes do running da zona. De feito, moitas destas persoas acostuman a adestrar no percorrido da Vía polas súas condicións suaves e bo mantemento do trazado.
Sobre a Vía Verde de Compostela-Tambre-Lengüelle
A Vía Verde de Compostela-Tambre-Lengüelle é a Vía Verde máis longa de Galicia. Coa posta das antigas vías do ferrocarril que unía Santiago coa Coruña e reutilizando 26 quilómetros de parte do seu trazado que atravesa os concellos de Oroso, Ordes, Tordoia e Cerceda, esta Vía Verde é un exemplo de recuperación e transformación de infraestructuras en desuso para obter unha nova vida e actividade.
«A difusión desta información encádrase no marco da subvención DP0030 concedida pola Deputación da Coruña á Asociación de Concellos da Vía Verde Compostela-Tambre-Lengüelle.»