Os candidatos do PSdeG ás eleccións autonómicas pola provincia Miguel Tomé e Jaime Losada, a Secretaria de Organización provincial e Alcaldesa de Antas de Ulla, Pilar García Porto, e o voceiro municipal do PSdeG en Chantada, Mariano López Nieves, mantiveron un encontro coa Asociación de Xubilados e Pensionistas da vila chantadina, onde subliñaron que, grazas ás subas aprobadas polo Goberno de Pedro Sánchez nos dous últimos anos, os 8.500 pensionistas das comarcas de Chantada e da Ulloa cobran agora de media 2.100 euros máis ao ano.
Neste sentido, os socialistas recalcaron que, “fronte ao ridículo 0,25% anual da época do PP, os socialistas subimos máis dun 12% as pensións en só dous anos” -un 8,5% no 2023 e un 3,8% neste 2024-, o que para Chantada e A Ulloa “supón unha inxección económica de case 18M€ máis ao ano ca no 2022, co efecto dinamizador que iso ten no consumo”.
“Revalorizar as pensións conforme ao custe da vida non é só de xustiza social, para favorecer o benestar da xente, senón que tamén supón un incentivo máis para a economía local, sobre todo no noso rural, porque o consumo xerado polos pensionistas coas prestacións que perciben é fundamental en sectores como a alimentación ou a hostalería, tamén en moitos produtos asociados coa terceira idade, e en moitos casos axudan aos fillos na crianza dos netos”. Polo tanto, “subir as pensións, nunha provincia eminentemente rural como a nosa, é tamén unha medida necesaria para fixar poboación”.
“Queda claro que a revalorizacións das pensións só se garante con gobernos progresistas, porque o PP, non o fai cando goberna, e vota en contra cando está na oposición”. “Teñen que explicar que lle fixeron os pensionistas para votar en contra deles e negarse sempre a que lles suban as pensións”, recalcaron os socialistas.
No caso concreto de Chantada, a pensión media medrou en 172€ ao mes con respecto ao 2022. Ese ano, o montante medio da prestación era de 731€ e hoxe é de 903€ mensuais, explicaron, engadindo que subas semellantes déronse tamén nos concellos de Taboada, Carballedo, Antas de Ulla, Palas de Rei e Monterroso, cunha suba media de 157€ máis ao mes na pensión dende o ano 2022 grazas ás medidas impulsadas polos socialistas e rexeitadas polo Partido Popular.