No pleno ordinario do Concello de Laxe, o grupo municipal de Unidas Podemos fixo patente o desacordo coa aprobación do salario do novo alcalde. Fernando Del Moral Regaldie salientou que «se ben é certo que a política debe estar remunerada, esta tamén debe estar relacionada co grado de experiencia», e comparou os salarios dos alcaldes e alcaldesas da zona, existindo cargos que xestionan municipios de máis poboación, con máis experiencia e por contra, salarios inferiores. En palabras de Regaldie, «se polo menos Laxe estivera ben xestionado, ben pago estaría, pero a realidade é que, ese soldo desproporcionado resta a toda a veciñanza».
Aprobada por unanimidade a moción presentada polo grupo para desenquistar o proxecto de parque empresarial.
Por outra banda, o grupo municipal presentou unha moción para desbloquear o vello proxecto de parque empresarial en Castrelo, que foi aprobada por unanimidade, cunha emenda do grupo nacionalista. En palabras de Regaldie «o PP prometeu levalo a cabo no programa de 2019 e de 2023, e xa vai con cinco anos de retardo, polo que non podía opoñerse». En Unidas Podemos consideran necesaria esta proposta, debido á perdida de poboación, a merma da actividade económica, o peche de negocios e a orientación a unha economía de servizos de carácter eventual no verán.
No turno de preguntas, Unidas Podemos puxo enriba da mesa a situación do cemiterio municipal, e a súa ordenanza reguladora, a número 28. Subliñou que, segundo a devandita ordenanza, a dirección do mesmo corresponde á Alcaldía, preguntando que accións vai tomar para cumprir e facer cumprila ordenanza coa finalidade de manter e conservar o cemiterio nas debidas condicións de salubridade e seguridade, xa que esta situación prexudica a todos e todas as conveciñas que teñen a intención de manter o recinto en condicións.