Martínez Allegue lembra que a Xunta leva 14 anos reclamando esta transferencia, aprobando o Parlamento por cuarta vez unha Proposición de Lei para esixir o traspaso
A Xunta insta ao Goberno a rematar co discriminación a Galicia e transferir a AP-9 para garantir unha xestión eficiente.
Así o manifestou hoxe no Parlamento a conselleira de Vivenda e Planificación de Infraestruturas, María Martínez Allegue, que reiterou ao Executivo estatal que desbloquee o traspaso desta infraestrutura que vertebra de norte a sur o 60% do territorio galego.
Lembrou que o Goberno galego leva 14 anos reclamando a transferencia da AP-9 a Galicia, unha solicitude amparada polo Parlamento, que aprobou por cuarta vez unha Proposición de Lei para esixir este traspaso.
Destacou que se trata dunha “lexítima demanda que choca non só coa negativa do Goberno de España, senón coa incongruencia no comportamento dos grupos parlamentarios de PSOE e do BNG que apoian a medida en Galicia pero non o fan en Madrid”.
Subliñou que “a Xunta non cederá no seu empeño por acadar unha AP-9 galega e seguirá esixindo que se cumpran os compromisos adquiridos tanto polo PSOE como o BNG, que prometeron implantar a gratuidade das peaxes das autoestradas estatais, a AP-9 e a AP-53”.
Lamentou que ata agora, “a realidade é que o Goberno central volveu subir as peaxes das dúas autoestradas estatais galegas a comezos deste ano, pois na AP-9, aumentaron as tarifas máis de 6,5%, e na AP-53, que comunica Santiago e Lalín, un 5%”, situándose entre as máis caras de España.
Recordou que as subas extraordinarias de peaxes foron declaradas por organismos independentes “nulas de pleno dereito” e “posibles axudas de Estado”, polo que “está sobradamente acreditado que o Goberno vela máis polos intereses da concesionaria que polos dos galegos”, puntualizou.
Contrapuxo esta política do Goberno coa da Xunta, que por segundo ano volveu conxelar as peaxes das dúas autoestradas autonómicas, A Coruña-Carballo (AG-55) e Vigo-Baiona (AG-57), que seguirán a ser así das máis baratas do país.
Neste sentido, a conselleira concluíu demandando a titularidade da AP-9 para Galicia e que veña acompañada tanto dos recursos necesarios para a súa correcta explotación como dos investimentos precisos para levar a cabo as obras pendentes.
Ademais sumou a reivindicación ante o Goberno para a liberación da peaxe da AP-53, de forma que se iguale o percorrido Santiago-Lalín co treito Lalín-Ourense que a Xunta vén mantendo gratuíto.