O presidente da Deputación da Coruña, Valentín González Formoso, acompañado da deputada de Vías e Obras, Mónica Rodríguez, o tenente alcalde de Ponteceso, Juan Ramón Vidal, o concelleiro de Obras, Constantino Fernández, o concelleiro Lois García Carballido, e técnicos da empresa adxudicataria e dos departamentos de Estradas e Arquitectura provinciais visitou hoxe as obras de construción do novo aparcadoiro no entorno de Balarés, en Ponteceso, cun investimento de 396.800 euros, que teñen como obxectivo ordear o estacionamento de vehículos e garantir a seguridade da veciñanza e dos numerosos visitantes que rexistra a praia, o pinar e a zona de lecer próxima, especialmente durante a época estival.
Fomoso anunciou que as obras avanzan a bo ritimo, que esta semana rematarán as tarefas de movemento de terras e que prevé que en setembro as obras estean completamente concluidas. «É necesario executar as obras durante o verán, xa que esta obra require de bo tempo para poder avanzar», afirmou o presidente, que incidiu en que este novo aparcamento solucionará a escasez de prazas de aparcamento no entorno da praia e o pinar, o que ocasiona aglomeracións de vehículos que con frecuencia impiden o acceso, incluso dos servizos de emerxencias.
Aparcamento verde
«Balarés é un espazo moi singular, moi vinculado á Deputación da Coruña», afirmou o presidente, que destacou que se trata dunha intervención branda, «perfectamente integrada no entorno natural da zona» para dotala un aparcadoiro que contará con 395 prazas, 4 delas para persoas con mobilidade reducida, viais de 5 metros de ancho e vía principal de acceso de 7 metros.
O pavimento estará composto por formigón con ocos recheos de terra sobre os que se dispón céspede. Isto permitirá unha resistencia maior para soportar o peso dos vehículos e, ao mesmo, tempo unha gran superficie verde cunha permeabilidade do 90%. Usaranse técnicas de drenaxe urbana sostible e disporanse árbores autóctonas no espazo para unha mellor integración na zona.
As obras inclúen ademais a construción dunha senda peonil de 116 metros de lonxitude e 2 metros de ancho, delimitadas a ámbolos lados por travesas de madeira, cunha pasarela-ponte de 4,5 metros para salvar o leito natural do regato existente na zona.
«É unha obra moi necesaria, sobre todo no verán e nas fins de semana, cando hai máis problemas de aparcamento. Estamos mirando de poñer unhas prazas accesibles máis preto da praia para que o acceso sexa máis doado», afirmou o tenente de alcalde, Juan Ramón Vidal.
Longo proceso de melloras na zona
Estas obras completan unha serie de melloras por importe de máis de 600.000 euros, levadas a cabo pola Deputación na área de lecer de Balarés , iniciadas en 2016 tras a visita á zona do presidente Valentín González Formoso, a petición do entón alcalde, Lois García Carballido. Renovación do mobiliario urbano, reparación dos elementos de madeira da área de lecer, renovación da fosa séptica, adecentemento e limpeza do entorno e pequenas melloras nos accesos foron algunhas das actuacións levadas a cabo inicialmente.
Posteriormente, en 2019, a Deputación adquiriu unha parcela de 34.000 metros cercana á área de lecer para continuar realizando melloras necesarias como a creación deste aparcamento verde, que permitirá rematar cos constantes problemas de tráfico e de estacionamento dos vehículos que ata agora estacionaban nos laterais da vía principal de entrada á praia, ocasionando dificultades nos accesos e problemas de seguridade, especialmente na tempada estival.