A alcaldesa e a presidenta da entidade asinaron dous convenios por importe de 39.000 euros para a o asesoramento e a loita contra a xenofobia
A alcaldesa, Inés Rey, e a presidenta de SOS Racismo Galicia, Sonia Mendes da Silva, asinaron no Palacio de María Pita a renovación de dous convenios de colaboración entre Concello e entidade, polos que a administración local achega un total de 39.000 euros para loitar contra a xenofobia.
Un dos con convenios, por importe de 20.000 euros, está destinado a financiar programas de inclusión social e gastos xerais da entidade derivados dos programas. A ese súmase un convenio por importe de 19.000 euros destinados ás actividades e uso da oficina de información e asesoramento para casos de racismo e xenofobia da entidade.
Inés Rey valorou o traballo de SOS Racismo para que A Coruña siga sendo «unha cidade aberta, acolledora e inclusiva coas persoas migrantes e na que non caben as actitudes racistas e xenófobas». Lembrou que o Concello conta con ferramentas municipais de apoio á poboación migrante, como a Unidade de Asesoramento ás Migracións (UAMI). «Este programa completa os servizos que poñemos á disposición desde o Concello coa UAMI, ofrecendo orientación e asesoramento xurídico, social e laboral así como apoio educativo á poboación menor e adolescente migrante e aos seus familiares a través da Escola Intercultural» concluíu.
Neste ano 2024, o Concello mantén convenios nominativos por máis de 3,7 millóns de euros con entidades que traballan pola inclusión, o benestar social, a igualdade e a atención de colectivos vulnerables.