Mercé Barrientos destaca “o desleixo e a falta de xestión municipal, porque hai un contrato de limpeza de praias que está asinado e en funcionamento”
O BNG de Muxía vén de denunciar “enerxicamente” o “estado lamentable” no que se atopa a Praia do Lago e a súa contorna, “co areal cheo de lixo, as papeleiras a rebosar e todo tipo de refugallos ciscados polo chan”. Os nacionalistas muxiáns sinalaron que foron interpelados por diversos visitantes que lle expresaron “a súa incredulidade polafalta de limpeza dun lugar marabilloso, que ademais ten dous cámpings e varios establecementos hostaleiros”.
A voceira da formación, Mercé Barrientos, subliñou que a situación é debida “ao desleixo e á falta de xestión municipal, porque hai un contrato de limpeza de praias que está asinado e en funcionamento, e non podemos crer o estado desolador no que está a praia do Lago”.
Barrientos destacou que á falta de limpeza nas praias hai que sumarlle o feito de que Muxía é dos poucos concellos que non van ter este verán servizo de socorrismo nos areais da localidade. “A xestión que se está facendo desde o goberno municipal é nefasta”, sentenciou a concelleira do BNG.