Este sábado, 13 de xullo, celébrase na carballeira de Santa Isabel, en Outeiro de Rei, a XIª edición do Convivio da Cultura Galega, que organiza a Casa-Museo Manuel María xunto á Federación de asociacións Galiza Cultura. Unha festa que pretende rememorar aquelas esencias das festas populares das que tanto gostaba Manuel María, como a romaría que se facía no seu Outeiro natal ao pé do río Miño, nas que non faltaba a música e o xantar campestre e demorado. Unha edición, esta, que ten algo de especial pois están a piques de se facer vinte anos do falecemento de Manuel María, acontecido o 8 de setembro de 2004.
A xornada festiva deste sábado comezará ás 11.15h, sendo a Casa-Museo Manuel María o punto de encontro e a coral Solfa a encargada de lle dar a acollida a festeiros e festeiras. De alí sairase cara ao cemiterio para levar a cabo unha pequena ofrenda a Manuel María e Saleta. Será Xosé Lois García, escritor chantadés moi unido a Manuel María, quen dirixirá unhas palabras de lembranza para o escritor e a súa compañeira Saleta.
Desde as 12:30h a festa discorrerá na Carballeira de Santa Isabel, onde actuará a Banda Xuvenil de Rábade, Begonte, Outeiro e Friol, Sons e Soños, queestrea para a ocasión a peza titulada Terra Chá, composta por Carlos Seráns sobre un texto de Manuel María, e que estará acompañada para esta e outras cancións pola soprano e profesora de canto Tabea Graser. Logo do concerto, celebrarase un xantar de convivio para o que a organización pon a disposición mesas e cadeiras con reserva.
A festa continuará pola tarde, ás 16.30h, cunha foliada conducida por Xurxo Souto, e onde non faltará a música de Tradivivas Agra, Reviravolta, Vento Mareiro e Parabéns, que darán paso posteriormente, ás 18h, aos Carunchos. Este quinteto de música tradicional que están a celebrar os seus trinta anos de andaina, presentarán en concerto o recente traballo musical que veñen de editar Unha gorxa chea de paxaros, disco dedicado integramente a Manuel María, onde non faltan poemas emblemáticos como «A fala» ou «Galiza» e outros menos divulgados como «O poder de esquecer» ou «Tríadas dos soños».
Durante a mañá, as directivas das entidades que conforman a federación Galiza Cultura manterán un encontro, ás 12.15, no auditorio da Casa-Museo para articular a súa actuación en común para o próximo ano.