A delegación territorial en Galicia do Colexio Oficial de Enxeñeiros Navais e Oceánicos recoñece, este xoves 11 de xullo, ás 19:00 horas, no Salón de Actos Concepción Arenal do Campus Industrial de Ferrol, a 11 Catedráticos de Universidade e de Escola Universitaria da Universidade da Coruña no marco das actividades programadas para festexar o día da súa patroa, a Virxe do Carme.
Ao longo do evento, o Colexio Oficial de Enxeñeiros Navais e Oceánicos renderanlle unha homenaxe a Carlos Otero Rivera, Emilio Lage Vellón, José María de Juan-García Aguado e a Primitivo González López, todos eles Catedráticos de Escola Universitaria xa xubilados e vinculados, no seu momento, á antiga Escola Universitaria Politécnica (EUP), creada en 1972 e situada en Serantes.
Tamén recoñecerá o labor de Alfonso García Ascaso, Daniel Pena Agras, Enrique Casanova Rivas, Francisco Gómez Giráldez, Javier del Moral Hernández e José Miguel Fraguela Formoso, todos eles Catedráticos de Universidade xa xubilados e vinculados á antiga Escola Politécnica Superior (EPS), creada en 1991 e emprazada no barrio de Esteiro.
Nesa listaxe figura tamén Luis Carral Couce, catedrático de Universidade en activo que imparte docencia na Escola Politécnica de Enxeñaría de Ferrol (EPEF), nada en 2021 logo do proceso de integración da Escola Universitaria Politécnica (EUP) e da Escola Politécnica Superior (EPS).
O programa do acto inclúe a entrega do Premio ao “Ilustre Enxeñeiro Naval” da Zona Norte, outorgado a José María González Llanos e que recollerá o seu fillo, Jesús González Llanos, así como a entrega de insignias aos novos colexiados e colexiadas. Está previsto que a vicerreitora do Campus de Ferrol e Responsabilidade Social, Ana Ares, o almirante xefe do Arsenal Militar de Ferrol, o vicealmirante Ignacio Frutos Ruíz; e o decano territorial en Galicia do Colexio Oficial de Enxeñeiros Navais e Oceánicos, Jorge Dahl, inauguren un acto ao que tamén asistirán o director do Campus Industrial da Universidade da Coruña, Marcos Míguez, e do director da Escola Politécnica de Enxeñaría de Ferrol (EPEF), Vicente Díaz Casás, entre outras autoridades.