A exposición, que e forma parte das actividades da programación ‘Xaquín Marín alén das viñetas’ que Galiza Cultura vén realizando desde 2022, é de carácter itinerante polo que ten previsto ser achegada a máis espazos na Galiza, tendo como obxectivo dar a coñecer, ao máximo posíbel da sociedade galega, a vasta obra do polifacético autor
A Federación de asociacións culturais Galiza Cultura, entidade federativa que reúne na actualidade a máis dunha trintena de asociacións culturais do país, achega a cidade de Lugo, desde este venres 19, e até o 10 de outubro, nos espazos do Centro Sociocultural O Vello Cárcere (praza da Constitución, s/n) o proxecto expositivo ‘Xaquín Marín. Humor líquido galego’ da súa programación de actividades que desenvolve baixo o título ‘Xaquín Marín alén das viñetas’ ao redor da obra do pintor, humorista gráfico, creador de banda deseñada, cartelista, ilustrador e muralista.
Este proxecto de selección, no que vén traballando a Federación desde 2022 é unha oportunidade única, e nunca vista no seu caso, para ter unha imaxe o máis completa posible do universo de ideas e dos procesos creativos dun artista tan polifacético e singular como é Xaquín Marín.
Deste xeito, e grazas un traballo minucioso de selección realizado durante este tempo, cun florilexio único e moi escollido, poderemos (re)descubrir os inicios de Xaquín Marín como pintor social e a posterior evolución na procura dunha arte xenuinamente galega, quizais a parte máis descoñecida polo público de toda a súa carreira.
Asemade, esta selección dá a posibilidade de repasar o seu vasto traballo no campo do humor gráfico e da banda deseñada e a súa incansable defensa de Galiza e da lingua galega e o seu fondo compromiso cos intereses das galegas e os galegos asistindo ao nacemento de personaxes ou series xa icónicas como Gaspariño, o Pé, Isolino, o cacique Don Augusto, Lixandre, Tonecho, Caitano ou o Xinete, pois a mostra tenta seguir os pasos do seu inabarcable labor, tamén, como ilustrador, cartelista, portadista, muralista, conferenciante, escritor ou divulgador.
Nesta mostra teremos o privilexio de ver algúns proxectos do autor que por uns motivos ou outros acabaron nun caixón e permaneceron até o día de hoxe inacabados e/ou inéditos, amosándose por primeira vez ao público, pequenas primicias que completan ao conxunto da obra xa publicada e coñecida.
Con todo, o proxecto expositivo quere ser un percorrido retrospectivo pola obra do artista máis, tamén, un percorrido pola nosa propia memoria colectiva como galegas e galegos que vivimos neste «Impaís», como el mesmo remarcaba, xa que logo Xaquín Marín é o cronista gráfico da Galiza popular dos últimos 60 anos.
Esta exposición, de carácter itinerante, iniciou a súa andaina no pasado mes de abril na cidade da Coruña e ten previsto achegarse a máis cidades galegas, xa que o obxectivo da escolma realizada é dar a coñecer, ao máximo posíbel na sociedade galega, a vasta obra do autor, ao cal, precisamente, a Federación Galiza Cultura organizaba en outubro do ano pasado un grande acto nacional de homenaxe en Ferrol, no que participaron as súas compañeiras e os seus compañeiros de profesión, como recoñecemento a esta longa traxectoria profesional e vital.
A actividade está financiada grazas ás axudas do programa FO203 de subvencións a entidades sen fins de lucro para a realización de actividades culturais durante o ano 2024 da Área Cultura da Deputación da Coruña, e conta coa colaboración do Concello de Lugo e o Centro Sociocultural O Vello Cárcere.