En Galicia hai diagnosticadas de enfermidade pulmonar obstructiva crónica máis de 100.000 persoas e os expertos din que a cifra seguirá aumentando.
As deputadas do Grupo Parlamentario dos Socialistas de Galicia, Elena Espinosa e Paloma Castro, rexistraron unha proposición non de lei (PNL) para o seu debate no Parlamento galego co obxectivo de, por unha banda, recuperar a realización de espirometrías nos centros de saúde de Galicia para facilitar o diagnóstico e tratamento de enfermidades respiratorias e, por outra, realizar un estudo desde marzo ata o 31 de decembro do presente ano para avaliar a redución do uso de inhaladores presurizados e o seu impacto nas emisións de CO2.
Unha das causas máis frecuentes das visitas a Urxencias
Debido á crise sanitaria provocada polo COVID-19, as espirometrías deixaron de programarse polo risco de contaxio. Actualmente, o ritmo de diagnóstico con este sistema non alcanzou os niveis óptimos, a pesar de ser unha proba non invasiva, accesible e económica, necesaria para reducir o grave infradiagnóstico da Enfermidade Pulmonar Obstructiva Crónica (EPOC).
A EPOC segue sendo unha enfermidade pouco coñecida, a pesar de que afecta a un gran número de persoas e é a terceira causa de morte no mundo. En Galicia, máis de 100.000persoas están diagnosticadas de EPOC, unha cifra que segundo os expertos podería incrementarse no futuro. Trátase dunha enfermidade crónica que reduce o fluxo de aire e causa problemas respiratorios. As principais causas da EPOC son o tabaquismo e a contaminación do aire e aínda que non se pode curar, o tratamento pode aliviar os síntomas e mellorar a calidade de vida dos pacientes.
«A EPOC é unha das causas máis frecuentes de atención médica, especialmente en urxencias, e conta cunha alta taxa de reingresos. As medidas preventivas e o diagnóstico precoz son fundamentais para mellorar a calidade de vida dos pacientes e reducir a carga no sistema de saúde,» afirmou Elena Espinosa.
Na súa Proposición Non de Lei, as socialistas instan á Xunta a dotar a todos os centros de saúde de atención primaria dun espirómetro para elevar o diagnóstico das enfermidades respiratorias e facilitar un acceso máis equitativo a estas probas, tendo en conta que falamos de enfermidades cunha taxa de infradiagnóstico do 79 % en termos globais.
Así mesmo, demandan a realización de cursos de reciclaxe ao persoal sanitario, especialmente de enfermería, para garantir a correcta realización de espirometrías, e incluír a espirometría como proba rutineira nas revisións médicas realizadas polas áreas de atención primaria, co fin de abordar un cribado masivo de enfermidades respiratorias.
Novos tratamentos que reducen os gases contaminantes
Un dos principais problemas derivados do uso de inhaladores presurizados é a contaminación. En Galicia hai pacientes que xa poden beneficiarse da prescrición por parte do Sergas de inhaladores de po seco fronte aos tradicionais, reducindo desta forma a emisión de gases contaminantes.
Na súa proposición non de lei, as socialistas demandan á Xunta a realización dun estudo desde marzo ata o 31 de decembro do presente ano para avaliar a redución do uso de inhaladores presurizados e o seu impacto nas emisións de CO2.
Así mesmo, solicitan un informe anual a partir de xaneiro de 2025 sobre a redución de inhaladores presurizados e o seu impacto na diminución de gases contaminantes.
«É crucial que implementemos estas medidas para non só mellorar a calidade de vida dos pacientes con EPOC, senón tamén para contribuír á descarbonización do sistema de saúde e a loita contra o cambio climático,» subliñou Paloma Castro.