A rexedora visitou esta mañá ás e aos participantes nas sesións de zumba na praia de Riazor. “O obxectivo é achegar á cidadanía á práctica do deporte, independentemente da súa idade, interiorizando hábitos saudables”, expuxo
A alcaldesa, Inés Rey, e o concelleiro de Deportes, Manuel Vázquez, visitaron este luns en Riazor ás e aos participantes no programa municipal Coruña en forma , unha iniciativa que, ata finais de agosto, implica a cidadanía na práctica deportiva en espazos ao aire libre, en actividades que non requiren de inscrición previa e tampouco teñen límite de idade.
Hoxe pola mañá, acompañando ás persoas que participaron na sesión de zumba prevista na explanada do Paseo Marítimo de Riazor, Rey puxo en valor o principal obxectivo do programa, «que é achegar ás coruñesas e coruñeses á práctica do deporte, independentemente da súa idade, interiorizando hábitos saudables no seu día a día».
Nesta edición de Coruña en Forma ofértanse actividades e ioga, tai chi, ximnasia aeróbica, zumba, pilates e tonificación muscular, entre outras. Ademais, tamén hai propostas de lecer para as fins de semana, con rutas a patíns e xogos con cans. Toda a programación está supervisada por profesionais con formación na actividade física.
A alcaldesa incidiu, ademais, no aproveitamento dos espazos naturais da cidade para a execución das actividades. Ademais da contorna da praia de Riazor, tamén no miradoiro do Matadoiro, o parque Europa e o parque de Vioño, así como en áreas ao aire libre en barrios como Os Rosales (praza Elíptica), Monte Alto (praza dos Avós), a praza dos Mariñeiros, Novo Mesoiro (na pista de fútbol Cruyff Court), Someso (na praza de Expocoruña) e en Palavea, ante o mercado.
Enclaves como Riazor, núcleo e corazón do programa, funcionan moi ben todos os veráns a nivel de demanda cidadá, pola súa localización, á beira do mar, e a súa visibilidade. Rey apuntou que, neste sentido, «tamén se están a ter en conta, ano a ano, as peticións veciñais para ampliar ou estender o radio de acción do programa aos demais barrios».
A rapazada da Coruña xa goza dos Campamentos Deportivos
Tamén esta mañá, a alcaldesa visitou ás nenas e nenos que participan nos Campamentos Deportivos Municipais que se levan a cabo nas instalacións deportivas de Riazor. Ata finais de agosto, centos de rapazas e rapaces en idade de 6 a 13 anos tomarán parte nas múltiples actividades previstas de luns a venres, en horario de mañá.
«Iniciativas como esta fan máis sinxela, ano tras ano, a conciliación familiar, e tamén contribúen a fomentar valores positivos entre as novas xeracións. Non só a práctica deportiva e os hábitos saudables, senón tamén a amizade e o traballo colectivo», apuntou a rexedora.