“O que está a facer o PP desde a Xunta de Galicia con SOGAMA é unha auténtica vergonza”, valorou Tomé Roca. Explicou que no último ano e medio, a Xunta de Galicia e a empresa pública de tratamento de residuos acordaron xa unha suba de 39€ por tonelada –ata os 66€/t- e de cara o 2025 pactaron un novo aumento doutros 42€, chegando a cobrar aos concellos 108€ por tonelada. “Unha suba para compensar as penalizacións da Unión Europea, cando o que deberían é cambiar o modelo de xestión de residuos”.
Sinalou o Secretario Xeral que “xa non nos sorprende, porque é unha práctica habitual do PP, que mintan e que lle pasen logo a factura ós cidadáns e ós concellos da súa mala xestión” e incidiu en que o grave de cargar “o seu desastre” sobre os veciños e veciñas e sobre os concellos, é que estes últimos “xa están asfixiados asumindo cada vez máis competencias con menos recursos”.
Tomé Roca anunciou que os socialistas volverán levar ao Pleno da Deputación de Lugo unha iniciativa para que se anule a suba do canon de Sogama; e na vindeira Executiva do PSdeG, prevista para o día 10 de setembro, “propoñeremos ás agrupacións que a leven aos plenos municipais”.