Xa están á venda as entradas para asistir a proxección deste mércores, que comezará ás 20.00 horas
Coa chegada de setembro, o Concello retoma un dos seus clásicos da programación cultural audiovisual nos recintos municipais, o ciclo ‘Documental do Mes’, que volve este mércores 4 ao Fórum Metropolitano coa proxección da longametraxe ‘Hágase tu voluntad’, do cineasta valenciano Adrián Silvestre.
A peza, producida por Producciones del Barrio e Nanouk Films, coa coprodución de Atresmedia Cine, é o proxecto máis persoal de Silvestre, que narra o seu reencontro co seu pai, Ricardo, tras vinte anos de ausencia. Ao retomar a súa conexión, reconstruíndo os seus lazos, tamén transformarán as vidas de todas e todos os integrantes da súa familia, ao tocar de preto unha cuestión tan íntima como é o dereito do ser humano a decidir sobre o final da súa propia vida.
En maio deste ano, ‘Hágase tu voluntad‘ chegou a España tras a súa estrea mundial no prestixioso Festival Internacional de Documentais de Thessaloniki (Grecia). A súa segunda parada foi en Barcelona, no Festival Internacional de Cinema Documental Docs Barcelona, competindo na sección oficial. Agora, A Coruña abre as súas portas a unha proposta moi humana na que se abordan as relacións familiares desde o humor e o costumismo.
Xa están á venda as entradas para asistir á sesión deste mércores no Fórum Metropolitano, que comezará ás 20.00 horas, cunha duración de 98 minutos en versión orixinal. Os pases poden adquirirse na web de Ataquilla e tamén no Fórum, o propio día da proxección. Teñen un custo de 3 euros para o público xeral, con descontos especiais para as persoas posuidoras do Carné Xove, maiores de 65 anos ou en situación de desemprego.