ADOS chama á cidadanía a participar nas campañas de doazón de sangue ao longo do ano pero, especialmente, nestas xornadas previas á festividade do día 1 de novembro.
A Axencia de Doazón de Órganos e Sangue (ADOS) lembra a necesidade de doar sangue sempre nas xornadas inmediatamente anteriores ou posteriores ás pontes festivas, como sucede esta fin de semana coa conmemoración do 1 de novembro. Neste sentido, ADOS recorda que, todos os días do ano, precísanse entre 400 e 500 doazóns de sangue para cubrir axeitadamente as necesidades de compoñentes sanguíneos por parte dos nosos centros sanitarios.
Así mesmo, desde a Axencia de Doazón de Órganos e Sangue anímase a doar sangue a todos os galegos e galegas, xa que as inclemencias meteorolóxicas propias desta estación do ano poden menoscabar a participación da cidadanía. Para iso, lembra que as unidades móbiles da ADOS efectuarán os seguintes desprazamentos:
| DATA | DESPRAZAMENTOS |
| Luns 28 de outubro | Praza de España (Ferrol), Cuatro Caminos (A Coruña), Santa Cruz de Oleiros, Sigüeiro (Oroso), Porto do Son, Melide, Rúa do Paseo (Ourense), Meis e Rúa Príncipe e Barrio As Travesas (Vigo). |
| Martes 29 de outubro | Ortigueira, Campus de Elviña (A Coruña), Perillo (Oleiros), Curtis, Campus Vida (Santiago), Brión, Campus de Lugo, O Barco de Valdeorras, Nigrán, Zona Ferraría (Pontevedra), IES Chapela (Redondela) e CUVI (Vigo). |
| Mércores 30 de outubro | Campus de Esteiro (Ferrol), Campus de Elviña (A Coruña), Abegondo, Carral, Campus Vida e Praza Roja (Santiago), Castro Riberas de Lea, Barrio A Milagrosa (Lugo), Policía Nacional e Barrio San Francisco (Ourense), Gondomar, Campus de Pontevedra e Centro Educativo Aloya (Vigo) |
| Xoves 31 outubro | Policía Nacional (Ferrol), Perlío (Fene), Carballo, Cantón- Obelisco (A Coruña), Padrón, Boimorto, Praza Maior (Lugo), Ribadavia, Salvaterra de Miño, Sanxenxo e Tui |
| Sábado 2 de novembro | Carballo, Padrón, Cambados, Marín e Tui |
ADOS lembra que o chamamento á colaboración da cidadanía é xeneralizado aínda que esta semana precísase incrementar a participación dos grupos A Negativo e B Negativo.
Para máis información, ADOS dispón do sitio web: ados.sergas.gal, as redes sociais, e o teléfono gratuíto: 900 100 828, para resolver calquera dúbida relacionada coa doazón de sangue ou coñecer a data dos desprazamentos das unidades móbiles.