A Deputación apoia con 50.000 euros a BRIEGAL para promover que a asociación dispoña dun equipo de busca e rescate de activación inmediata, con autonomía e autosuficiencia
A Deputación da Coruña financia con 50.000 euros a adquisición de material e maquinaria para o Grupo de Rescate Inmediato de Catástrofes da Asociación Busca e Rescate Integral e Emerxencias de Galicia (BRIEGAL).
O presidente provincial, Valentín González Formoso, e o seu homólogo de BRIEGAL, Manoel Tato, asinaron o convenio mediante o que a institución provincial contribuirá a adquisición de material que permita a BRIEGAL dispor dun equipo de busca de busca e rescate de activación inmediata coa autonomía, autosuficiencia e capacidades requiridas polos estándares establecidos de xeito internacional e que poida situarse no lugar onde se produza a catástrofe en menos de 24 horas.
Segundo explica a asociación, na actualidade non existe na provincia nin na comunidade autónoma un grupo de axuda especializado no rescate internacional de catástrofes e que poida ser activado de xeito inmediato.
«A devastadora DANA en Valencia lembrounos a importancia de dar unha resposta rápida e eficaz nas primeiras horas dunha catástrofe con equipos especializados, recursos adecuados e experiencia», afirmou Formoso, que destacou «o gran labor» da ONG BRIEGAL, que naceu como unha asociación de bombeiros voluntarios de Ferrol tras o terremoto de Turquía, en 2023.
Coa achega económica da Deputación da Coruña, a agrupación poderá adquirir maquinaria especializada como tronzadoras, martelos, serras, trades, cámaras de inspección ou desfibriladores. Tamén inclúe a adqusición de ferramentas como discos, punteiros, ciceis, brocas, chaves, desaparafusadores, lanternas ou grillóns, ademais de material como EPIs, mochilas, tubos de snorkel ou máscaras.