A vicerreitora do Campus de Ferrol e Responsabilidade Social, Ana Ares, e a concelleira de Turismo, Promoción Económica e Formación e Emprego de Pontedeume, Ángela Piñeiro, recibiron, este domingo, ás 09:45 horas, no Torreón dos Andrade, ás preto de 30 persoas que participaron nesta terceira etapa do Camiño Inglés, de Pontedeume a Betanzos, da man do Programa de Emprendemento Santander X Explorer UDC que promove a Vicerreitoría de Estudantes e Empregabilidade.
Ao longo deste percorrido de máis de 19 kms, os e as participantes realizaron unha parada no espazo coworking A Casa do Pescador, en Miño, onde foron recibidos polo concelleiro de Turismo, Deportes e Promoción Económica, José Manuel Pantín, e outra no hotel rural Bemar do Camiño, en Paderne. Á súa chegada a Betanzos visitaron o casco histórico da vila e conversaron coas integrantes da Xunta Directiva da Asociación de Comerciantes e Empresarios (ACEBE), Mónica Souto e Sonia Romero.
Esta iniciativa segue os pasos do proxecto de divulgación científica “Camiño ConCiencia” que impulsaron os investigadores do Centro de Investigación en Tecnoloxías Navais e Industriais (CITENI), Ana Ares, Armando Yáñez e Ginés Nicolás co apoio da Fundación Española para a Ciencia e a Tecnoloxía (FECYT), dependente do Ministerio de Ciencia e Innovación. O seu principal obxectivo era o de percorrer as seis etapas do Camiño Inglés desde Ferrol ata Santiago de Compostela e coñecer máis polo miúdo o Campus Industrial de Ferrol e as súas potencialidades nos eidos da docencia, da transferencia e da investigación.
Foto: a vicerreitora do Campus de Ferrol e Responsabilidade Social, Ana Ares, e a concelleira de Turismo, Promoción Económica e Formación e Emprego de Pontedeume, Ángela Piñeiro, xunto coas preto de 30 persoas que este domingo realizaron a terceira etapa do Camiño Inglés da man do Programa de Emprendemento Santander X Explorer UDC.
