O Grupo Socialista logrou que o Parlamento de Galicia gardase un minuto de silencio en solidariedade coas vítimas en Gaza, un xesto que se produciu tras días de bloqueo e presión por parte do Partido Popular. O presidente da Xunta, Alfonso Rueda, insistiu en referirse ao conflito como «guerra», evitando o termo «xenocidio».
O PSdeG denuncia que o PP rexeitou a súa proposta ata minutos antes de comezar a sesión plenaria. A iniciativa socialista, que xa contaba co apoio do BNG e de Democracia Ourensana, foi aceptada polo PP só cando se viu en minoría, demostrando o seu illamento. Con todo, a rectificación chegou con matices: o presidente do Parlamento negouse a ler o texto en voz alta, privando ao acto da solemnidade que requiría.
Durante o minuto de silencio, as deputadas e deputados socialistas exhibiron cartolinas coa mensaxe “Paremos o xenocidio en Gaza”, en claro contraste coa ambigüidade do PP.
Posteriormente, na súa intervención, o voceiro socialista José Ramón Gómez Besteiro criticou duramente a postura do Partido Popular. “O que non se podía comprender era a indiferencia dos que permaneceron calados”, afirmou, e advertiu que “a neutralidade axuda ao opresor, o silencio ante o horror axuda ao verdugo”.
Besteiro tamén espetou a Rueda que non está «convencido» do minuto de silencio e reprochoulle a súa falta de liderado. O voceiro socialista acusou o PP de asumir as posicións da ultradereita en temas como o negacionismo climático ou a xestión da violencia machista e a acollida de menores migrantes, e pediulle que poña «pé en parede e con firmeza tome partido».
A nota de prensa conclúe coa esixencia de Besteiro a Rueda de que, como presidente de todos os galegos, se opoña formalmente a esas actitudes e deixe de ser cómplice da extrema dereita.
