A viceportavoz segunda do Grupo Socialista no Parlamento de Galicia e secretaria de organización do PSdeG, Lara Méndez, sinalou a “profunda preocupación” dos e das socialistas galegas ante a situación que atravesa Sargadelos, tras coñecerse esta mañá a intención da dirección de pechar a planta de Cervo.
Méndez explicou que o Grupo Socialista vén de rexistrar no Parlamento unha batería de iniciativas para esixir á Xunta explicacións sobre o que está a acontecer coa empresa. “Queremos saber que medidas vai tomar o Goberno galego ante unha situación que, de confirmarse, suporía un duro golpe para o emprego na Mariña e para o futuro dunha marca que forma parte da nosa identidade colectiva”, indicou.
A dirixente socialista subliñou que a preocupación non é só pola destrución de postos de traballo, “senón tamén porque estamos a falar dunha empresa que é símbolo de Galicia, recoñecida dentro e fóra do país, e cunha enorme carga histórica, cultural e emocional”.
Lara Méndez instou á Xunta a actuar con responsabilidade e transparencia, e a poñer todos os mecanismos ao seu alcance para garantir a continuidade da actividade de Sargadelos e a protección dos empregos na comarca.
“Galicia non pode permitirse perder Sargadelos nin mirar para outro lado mentres se poñen en risco proxectos que forman parte do noso patrimonio colectivo”, concluíu.
