A Corporación Provincial acordou este martes na sesión plenaria unha Declaración Institucional polo Día Nacional da Convención sobre Dereitos das Persoas con Discapacidade que se celebrará este sábado, 3 de maio. Todos os grupos políticos con representación na Deputación de Lugo –PSdeG, BNG e PPdeG- acordaron un texto que pretende contribuír a impulsar un cambio de perspectiva na sociedade.
“A conmemoración deste día busca sensibilizar sobre a importancia de cumprir cos tratados internacionais de dereitos humanos ratificados por España e resaltar o papel da convención como referencia clave no desenvolvemento de políticas públicas e reformas lexislativas en materia de discapacidade”, cita o texto. Dar prioridade ao recoñecemento das capacidades diferentes destas persoas, a súa vida en comunidade e o seu dereito para desenvolver o seu proxecto de vida, son algúns dos obxectivos.
Os compromisos acadados pasan por traballar para garantir a accesibilidade universal, a igualdade de oportunidades, a non discriminación e a plena inclusión das persoas con discapacidade na vida social, económica e cultural; a loita contra a discriminación laboral para que teñan as mesmas oportunidades que o resto da poboación; promover a súa participación activa na toma de decisións que afectan á súa vida; ou a unha vivenda digna, accesible e adaptada as súas necesidades.
Adhesión rede de entidades gandeiro-cárnica
Ademais, o Pleno acordou por unanimidade a adhesión á rede de entidades locais Gandeiro-cárnica, impulsada pola Federación Española de Municipios e Provincias (FEMP), que permitirá á institución provincial reforzar a colaboración con outras entidades para impulsar iniciativas conxuntas coa finalidade de fortalecer o sector. O Goberno levou a Pleno esta proposta tendo en conta o papel “vital” da actividade gandeira e cárnica no desenvolvemento económico, social e ambiental na provincia.
DECLARACIÓN INSTITUCIONAL DA DEPUTACIÓN DE LUGO
POLO DÍA NACIONAL DA CONVENCION SOBRE DEREITOS DAS PERSOAS CON DISCAPACIDADE 3 DE MAIO DE 2025
O 22 de febreiro de 2019, o Consello de Ministros declarou o 3 de maio como Día Nacional en España da Convención Internacional sobre os Dereitos das Persoas con Discapacidade de Nacións Unidas. Esta Convención, recoñecida como un tratado internacional de dereitos humanos de obrigado cumprimento, orienta aos Estados na adopción de políticas baseadas nun enfoque de dereitos humanos en materia de discapacidade.
España ratificou este tratado en 2007 e incorporou o seu contido ao ordenamento xurídico o 3 de maio de 2008. Desde entón, supuxo un avance significativo na garantía de dereitos para as persoas con discapacidade. Entre os seus principais logros destacan a súa integración no sistema de protección de dereitos humanos de Nacións Unidas, o recoñecemento da discapacidade como unha cuestión de dereitos fundamentais e a creación dun marco legal esixible.
A Convención susténtase en principios esenciais como a dignidade, a autonomía, a igualdade de oportunidades, a non discriminación, a accesibilidade e a participación inclusiva. Ademais, promove a igualdade de xénero e o respecto á identidade e o desenvolvemento da infancia con discapacidade, principios que deben aplicarse de maneira transversal na defensa e garantía dos dereitos recoñecidos no tratado.
Segundo os últimos datos do Instituto Nacional de Estatística, en España hai máis de catro millóns de persoas con discapacidade. Con todo, só una de cada catro en idade laboral ten emprego. Ademais, un millón e medio de persoas enfronta barreiras para desprazarse na súa vivenda, o seu edificio e os seus accesos, dificultades que tamén afectan os espazos públicos, as cidades e o acceso ás novas tecnoloxías e a comunicación.
O deseño de contornas, produtos e servizos segue respondendo maioritariamente a un modelo baseado na ausencia de discapacidade ou de necesidade de apoio. Esta visión xera barreiras que limitan a participación plena das persoas con discapacidade e perpetúa situacións de discriminación.
A Convención contribúe a visibilizar ás persoas con discapacidade, recoñecendo a súa dignidade, o seu valor e a súa liberdade. Así mesmo, impulsa un cambio de perspectiva na sociedade: onde antes poñíase a énfase na discapacidade, agora priorizar o recoñecemento das súas capacidades, a súa vida en comunidade e o seu dereito para desenvolver o seu propio proxecto de vida.
A conmemoración deste día busca sensibilizar sobre a importancia de cumprir cos tratados internacionais de dereitos humanos ratificados por España e resaltar o papel da Convención como referencia clave no desenvolvemento de políticas públicas e reformas lexislativas en materia de discapacidade.
Un avance significativo nesta liña foi a reforma do artigo 49 da Constitución Española, aliñado agora cos principios da Convención. Tanto esta reforma como o tratado comparten un mesmo obxectivo: garantir o pleno exercicio dos dereitos humanos das persoas con discapacidade, eliminando barreiras e fomentando a súa inclusión real e efectiva na sociedade.
Ademais, en 2024 o Parlamento Europeo aprobou a directiva que regula a tarxeta europea de discapacidade e actualiza a tarxeta de estacionamento reservado para persoas con discapacidade en toda a Unión Europea. Esta regulación supón un avance importante ao establecer un estatuto europeo que recoñece os dereitos deste colectivo máis aló da normativa específica de cada Estado.
Este 3 de maio, a Deputación de Lugo reafirma o seu compromiso cos principios e mandatos da Convención Internacional sobre os Dereitos das Persoas con Discapacidade e fai un chamamento aos Gobernos Locais para que formulen as súas políticas desde un enfoque baseado nos dereitos humanos, por iso:
● Instamos as entidades locais a garantir a accesibilidade universal, a igualdade de oportunidades, a non discriminación e a plena inclusión das persoas con discapacidade na vida social, económica e cultural dos nosos municipios e cidades.
● Solicitamos ás entidades locais que contribúan á loita contra a discriminación laboral das persoas con discapacidade para que teñan as mesmas oportunidades de que o resto da poboación para o seu desenvolvemento profesional e persoal.
● Instamos as entidades locais a cumprir coa reserva de prazas ofertadas de emprego público para persoas con discapacidade segundo o establecido legalmente e a realizar accións para o impulso da súa contratación por parte do sector empresarial.
● Chamamos aos Gobernos Locais a promover a participación activa das persoas con discapacidade na toma de decisións que afectan á súa vida e á súa comunidade. É fundamental garantir a súa representación nos órganos de consulta e no deseño de políticas públicas que impacten no seu benestar, reforzando así o principio de autonomía e autodeterminación.
● Instamos os Gobernos Locais a impulsar políticas públicas de vivenda que garantan o dereito das persoas con discapacidade e as persoas maiores a unha vivenda digna, accesible e adaptada ás súas necesidades. É fundamental fomentar a rehabilitación e adaptación do parque de vivendas
existente, así como o desenvolvemento de novas fórmulas habitacionales inclusivas, como vivendas con apoios, modelos colaborativos ou solucións de ‘cohousing’, que favorezan a autonomía e a vida independente na comunidade.
● Animamos ás entidades locais a investir en contornas accesibles e no desenvolvemento de solucións innovadoras que favorezan a autonomía das persoas con discapacidade. Desde a adaptación dos espazos urbanos ata a incorporación de tecnoloxías accesibles, é imprescindible avanzar cara a cidades deseñadas para todas as persoas, sen excepcións nin barreiras. A accesibilidade universal debe ser un piar esencial no urbanismo e a planificación dos nosos municipios.
● Solicitamos ás entidades locais que cumpran cos principios reitores e as disposicións establecidos na Convención sobre os Dereitos das Persoas con Discapacidade. Só desde a acción local poderemos construír unha sociedade máis inclusiva e xusta para todas as persoas, onde a diversidade sexa recoñecida como un valor e cada persoa poida desenvolver a súa vida con autonomía, igualdade e dignidade. É momento de transformar o compromiso en accións concretas que garantan un futuro sen barreiras nin exclusións.
