O presidente da Deputación da Coruña, Valentín González Formoso, visitou a montaxe do escenario principal do Festival Noroeste na praia de Riazor. Fíxoo xunto co concelleiro de Cultura da Coruña, Gonzalo Castro, e o director corporativo de Hijos de Rivera, Antonio Viejo.
Formoso destacou a colaboración da institución provincial na 38ª edición deste «festival único». Segundo el, a singularidade do evento reside non só na cantidade de actuacións —38 concertos en cinco días— senón tamén no seu carácter gratuíto.
O escenario de Riazor acollerá actuacións de Luar na Lubre, Guadi Galego, Grande Amore, Carlos Ares, Siloé e The Vaccines.
Valoración sobre a situación dos lumes
En declaracións posteriores, e a preguntas dos medios, o presidente provincial mostrou a súa solidariedade coas persoas afectadas polos incendios forestais. Formoso cualificou a situación de «momentos moi duros», segundo lle transmitiron os veciños de Balarés.
O presidente da Deputación destacou o «enorme» labor dos equipos contraincendios en Ponteceso e Camariñas, e mostrou a súa preocupación pola acción de quen prende lumes. Cualificou estes actos como «terrorismo ambiental» e lamentou que haxa persoas que «poñen en perigo a todo o mundo» coa súa actitude.
