Os equipos femininos sucumben perante Baxi Ferrol e Montrove.
Sabor agridoce para a xornada do Club Santo Domingo Betanzos. Se os cadetes de primeiro ano do Javier Caamaño Arquitecto e os júnior masculino lograban sumar as primeiras vitorias do ano para a canteira, as cadetes de Decornaveira e as júnior de Infor-B equilibraban a balanza para deixar un 2 de 4 nesta xornada reducida para o club das Mariñas.
Inauguraron a fin de semana as júnior de Infor-B no pavillón ferrolán de Batallóns o sábado ás 10h, nun partido marcado polo 25-3 do terceiro cuarto que as betanceiras souberon competir durante o resto de períodos: 9-8 no primeiro, 10-6 no terceiro e vitoria por 11-13 no terceiro para un 55-30 que se cadra soubo a pouco para ambos os dous equipos. Ese mesmo serán, as cadetes de Decornaveira visitaban a pista de Montrove e a sorte non foi distinta: 94-42 para o equipo de Oleiros, netamente superior, que asina así a súa candidatura para a fase de ascenso.
A primeira vitoria da xornada chegou cos cadetes masculino de Javier Caamaño Arquitecto. As dúbidas do debut na categoría axiña se despexaron cun arranque de 0-14 fronte a Maristas, un parcial que permitiu rotar banco e repartir minutos (reforzaron a expedición dous infantís) para un cómodo 45-86 que supón a primeira marca para un equipo anovado tanto na dirección coma no banco (tres baixas e tres xogadores novos) e que está á espera de coñecer o verdadeiro nivel dos seus rivais no grupo D da Coruña-Bergantiños. Pola súa parte, e para completar ese 50% de vitorias da xornada, os júnior do club deron boa conta do Kempape, na Coruña, por 55-79, nun encontro dominado de inicio á fin polos mozos betanceiros, que non deixaron que os coruñeses tomaran vantaxe nin nos primeiros minutos do partido.
As júnior de Infor-B e as cadetes de Decornaveira descansan a fin de semana vindeira, os cadetes de Javier Caamaño mídense ao Basquet Coruña 2011 e os júnior repiten club rival (Basquet Coruña 2007) e os equipos infantís inician competición. A 25/26 está en marcha
