O Grupo Municipal Socialista de Arteixo deu a voz de alarma no último pleno sobre a construción dunha nova estación de servizo no polígono de Sabón. A gasolineira sitúase na Avenida da Deputación, a escasos metros do encoro do Rosadoiro, unha infraestrutura clave da que o Concello capta auga para subministrar ás empresas da zona industrial.
O portavoz socialista, Martín Seco, lembrou que o Concello realizou recentemente un importante investimento público para potabilizar a auga deste encoro. Por iso, considera «contraditorio e arriscado» que agora se permita unha instalación de almacenaxe de combustibles a tan curta distancia dunha fonte de abastecemento.
¿Unha gasolineira a menos de 50 metros da auga?
¿Unha gasolineira a menos de 50 metros da auga?Segundo as medicións do PSOE, as obras —situadas entre INOSA e a rotonda do Seixedo— poderían estar a menos de 50 metros do bordo do encoro. «Aínda que Augas de Galicia sexa a competente nos permisos, o Concello ten a obriga de velar pola protección ambiental dunha zona que el mesmo usa para dar servizo ao polígono», sinalan desde o grupo.
Os socialistas xa solicitaron o expediente completo da tramitación para comprobar se a instalación conta cos informes sectoriais preceptivos de Augas de Galicia e da demarcación hidrográfica Galicia-Costa.
Críticas á planificación urbanística
Desde o PSOE lembran que hai tres anos aprobouse unha modificación das normas urbanísticas de Sabón. Martín Seco critica que nese proceso non se blindase a protección ambiental do encoro nin a seguridade desta infraestrutura estratéxica.
«O noso obxectivo é garantir que a auga de Sabón conte con todas as garantías. Este tipo de decisións deben adoptarse coa máxima prudencia e transparencia, non poñendo en risco investimentos públicos xa realizados», concluíu o portavoz socialista.
