A Unión de Cidadáns Independentes de Galicia (UCIN Galicia) vén de reiterar a súa fonda preocupación polo impacto ambiental das obras de ampliación do Porto Deportivo de Baiona. Esta advertencia prodúcese tras a recente apertura dun procedemento xudicial no Tribunal Superior de Xustiza de Galicia (TSXG) para investigar as concesións e autorizacións relacionadas coas actuacións no dominio público portuario.
O coordinador de UCIN Galicia, José Luis Calo, subliña que a formación xa advertira sobre os riscos que este proxecto supón para o medio ambiente e os espazos naturais da ría. UCIN faise eco das queixas de organizacións veciñais e ecoloxistas sobre a falta dunha avaliación ambiental actualizada e os posibles efectos nocivos sobre a dinámica costeira e os hábitats sensibles da zona.
«Resulta imprescindible que calquera intervención no noso litoral non comprometa a sustentabilidade dos recursos naturais nin a saúde dos ecosistemas, máis aínda cando se trata de espazos tan valiosos como os das Rías Baixas”, declara Calo.
Para UCIN, a transparencia no proceso de concesión e a participación real da cidadanía son condicións indispensables para calquera modificación significativa no patrimonio público. Por iso, a formación esixe ás administracións competentes que garantan:
- Un Estudo de Impacto Ambiental (EIA) actualizado: independente e sometido a participación pública.
- Transparencia informativa: a publicación íntegra de toda a documentación técnica, xurídica e ambiental relativa á concesión e aos plans de ampliación.
- Seguridade xurídica e ambiental: a paralización de calquera traballo ou autorización ata que se complete un trámite ambiental rigoroso e se informe con claridade a todas as partes afectadas.
Para rematar, Calo insiste en que “a defensa do patrimonio natural non pode estar supeditada a intereses administrativos ou privados; Galicia merece que as decisións sobre o seu litoral se tomen con criterio e respecto polo medio ambiente”. UCIN Galicia reafirma así o seu compromiso coa protección do litoral e ponse á disposición da sociedade para acadar un emprego sostible do dominio público portuario.
