Katy Varela sinala que, aínda que nos últimos anos se realizaron numerosas actuacións de asfaltado nas rúas de Monforte, “non se pode dicir o mesmo do estado das beirarrúas, que presentan importantes deficiencias e supoñen un risco para os viandantes”.
Os concelleiros do Grupo Municipal Popular de Monforte de Lemos defenderán no vindeiro pleno unha moción para instar ao equipo de goberno a actuar de maneira urxente na mellora e mantemento das beirarrúas da cidade.
A voceira popular, Katy Varela, sinala que, aínda que nos últimos anos se realizaron numerosas actuacións de asfaltado nas rúas de Monforte “non se pode dicir o mesmo do estado das beirarrúas, que presentan importantes deficiencias e supoñen un risco para os viandantes”.
Neste senso, a voceira popular denuncia que existen numerosos tramos en mal estado en vías como a Rúa Ourense, a Rúa Compañía, a Rúa Eduardo Pondal, a Rúa Morín ou a Rúa Roberto Baamonde, entre outras.
Katy Varela considera que “é unha prioridade garantir a seguridade dos peóns” e lamenta que o goberno local “centre os seus esforzos en mellorar o pavimento e os espazos reservados aos vehículos, mentres descoida os espazos destinados ás persoas”.
Unha situación que xa provocou varias caídas e situacións de perigo para a veciñanza.
Katy Varela recorda que existen recursos económicos suficientes para afrontar estas actuacións, trala aprobación recente dun suplemento de crédito con cargo aos remanentes municipais, polo que “propoñemos que se destinen fondos á reparación e mantemento das beirarrúas, comezando polas zonas que presentan un maior deterioro”.
A voceira popular insiste en que “é necesario un plan de mantemento continuo que evite o abandono progresivo das infraestruturas peonís e garanta unha cidade máis accesible e segura para todos”.
