A alcaldesa de Lugo, Elena Candia, mantivo hoxe unha reunión co presidente da Confraría do Carme, Antonio de los Ojos, na que acordaron reeditar, por un período de catro anos, o convenio de colaboración para habilitar un aparcadoiro disuasorio de 50 prazas. O estacionamento situarase na parcela posterior da igrexa do Carme e terá acceso desde a rúa Poeta Noriega Varela.
O novo documento, que poderá prorrogarse por acordo de ambas as partes, dá continuidade a un proxecto estratéxico pola súa proximidade ao Casco Histórico e á Muralla. Aínda que actualmente hai un acordo en vigor ata o 1 de marzo de 2027, o aparcadoiro non chegara a poñerse en funcionamento, un paso que se concreta agora con este novo impulso.
Rehabilitación da Capela do Carme e dinamización do barrio
Rehabilitación da Capela do Carme e dinamización do barrioNo encontro tamén se abordou o avance nas obras de recuperación do patrimonio da zona. A alcaldesa ratificou o compromiso do Concello de seguir colaborando coa Consellería de Cultura da Xunta de Galicia ata completar a rehabilitación integral da Capela do Carme. Ata o momento, o Goberno galego leva investidos máis de 140.000 euros na reparación dos danos estruturais da cuberta, unha actuación clave para frear o deterioración do edificio.
Elena Candia avanzou a súa intención de que, unha vez rematadas as obras, o templo funcione como un motor de dinamización para o barrio, aproveitando o seu enclave no Camiño de Santiago. O obxectivo é que este espazo acolla concertos, actividades culturais e celebracións relixiosas, en coordinación co Bispado, a Confraría e outras institucións.
Recoñecemento ao traballo da Confraría
A rexedora destacou o «dinamismo» e a eficiencia da Confraría do Carme na xestión e execución de fondos e proxectos dentro dos prazos establecidos, agradecendo o seu compromiso coa recuperación e posta en valor desta contorna histórica da cidade.
