Unha ampla representación de cargos orgánicos e institucionais do BNG asistiu hoxe á XXXVIII edición da Feira do Poldro de Muras, celebrada na paraxe da Gañidoira. A comitiva estivo encabezada polos deputados no Parlamento de Galicia Daniel Castro e Ariadna Fernández (responsable de Gandería e Industrias Alimentarias), xunto co deputado provincial de Medio Rural, Daniel García, e os responsábeis comarcais Antonio Veiga e Iria Cotelo. Todos eles acompañaron ao rexedor municipal, Manuel Requeixo, e ás concelleiras Paula Gómez e Azucena Camba nesta cita de referencia para o outono galego.
O gandería extensiva e as razas autóctonas como eixo estratéxico
Durante a xornada, a deputada Ariadna Fernández puxo en valor a importancia estratéxica do gando equino e das razas autóctonas galegas. Os nacionalistas salientaron que o pastoreo extensivo no monte non só garante o mantemento dos ecosistemas, senón que constitúe unha ferramenta clave para a sustentabilidade ambiental e a prevención de incendios forestais.
Neste senso, Fernández puxo como exemplo a xestión do goberno municipal de Muras, que colabora estreitamente cos colectivos de gandeiros, un modelo que o BNG exporta alí onde goberna. Así mesmo, lembraron a relevancia doutros sectores produtivos locais como a apicultura, que tamén conta cun forte apoio institucional e cunha feira específica no mes de novembro.
Nacemento de “Marca Muras”, un selo de calidade e identidade territorial
O prato forte da xornada foi a presentación oficial de Marca Muras, un selo colectivo deseñado para comercializar os produtos locais baixo un paraugas común de calidade e prestixio. “Muras é un territorio único onde gando e veciños manteñen unha paisaxe milenaria. Agora con esta marca teremos un nome recoñecido para que o valor do noso se traduza nun mellor prezo e nunha maior proxección do territorio”, destacou o alcalde, Manuel Requeixo.
Este novo distintivo nace enfocado a produtos con alto potencial comercial na zona, tales como:
- A carne de vacún e o poldro do Xistral.
- O mel de montaña e a castaña.
- A verza de Muras e os cogumelos silvestres.
O proxecto impulsado polo Concello de Muras conta coa colaboración estratéxica da Área de Medio Rural da Vicepresidencia da Deputación de Lugo, a Universidade de Santiago de Compostela e entidades do sector. Pola súa banda, o deputado provincial Daniel García subliñou que a iniciativa servirá para potenciar a visibilidade turística e comercial do municipio, facilitando ademais un soporte técnico aos produtores para simplificar a burocracia e a xestión de axudas.
Un modelo de gobernanza centrado no rural e na veciñanza
Pola súa banda, o parlamentario Daniel Castro fixo fincapé na necesidade de estender o modelo de xestión de Muras a outros puntos do país: “É preciso máis alcaldes coma Manuel Requeixo e o seu equipo, mellorando as dotacións en infraestruturas e servizos, e que en temas como a enerxía actúen en favor da veciñanza e non das grandes eléctricas”.
Finalmente, o rexedor agradeceu expresamente o apoio económico e técnico achegado pola Vicepresidencia da Deputación de Lugo —a través de iniciativas como o programa “Un gusto de rural, un rural de gusto”— e gabou o labor fundamental que desempeña a asociación PURAGA na preservación e posta en valor das razas galegas na feira.
