Antonio Ameijide ve no 2027 “unha posibilidade de ouro” para que Carmela López amose un cambio real na Deputación de Lugo

O portavoz do Partido Popular na Deputación de Lugo, Antonio Ameijide, sinalou hoxe que a presidenta da institución, Carmela López, ten ante si «unha posibilidade de ouro» coa elaboración dos Orzamentos de 2027 para «demostrar se realmente houbo un cambio na Deputación ou se todo segue igual».

Desde a formación popular apuntan que o documento económico que se debate este mes debe servir para corrixir o rumbo da institución e converterse nun verdadeiro motor de dinamización para a provincia, fronte á inercia e á falta de proxecto político actual.

Máis investimentos para concellos e estradas

Para lograr este obxectivo, os populares puxeron enriba da mesa unhas liñas básicas e urxentes para as contas do vindeiro ano. Entre as principais demandas atópanse incrementar en 10 millóns de euros o Plan Deputación e destinar outros tantos (10 millóns máis) á mellora e mantemento da rede viaria provincial, un dos grandes déficits actuais das vías dependentes da institución.

Así mesmo, o PP propón habilitar un departamento específico de asesoramento e colaboración cos concellos centrado exclusivamente na captación e xestión eficaz de fondos europeos, unha ferramenta fundamental para os municipios máis pequenos.

Residuos, residencias e posta en valor do patrimonio

O voceiro popular, Antonio Ameijide, tamén solicitou que se reserve unha partida económica suficiente para abrir de forma definitiva as residencias de maiores e avanzar nos centros asistenciais que levan anos comprometidos e sen servizo.

No ámbito patrimonial e económico, o PP esixe rescatar e poñer en valor os inmobles propiedade da Deputación que hoxe están abandonados —como os clubs náuticos—, ademais de mellorar as instalacións deportivas provinciais e adecuar máis zonas verdes e áreas fluviais en todo o territorio.

Recuperar o papel tractor da provincia

De cara a «recuperar o papel da Deputación como verdadeiro motor de desenvolvemento», os populares consideran irrenunciable impulsar de vez os polígonos industriais comprometidos, pór en marcha un novo Plan Estratéxico de Turismo, implicarse activamente na seguridade e mantemento do Camiño de Santiago e potenciar a rede de Museos Provinciais, contemplando especificamente a ampliación do Museo do Mar.

Para o PP, os orzamentos de 2027 son a reválida definitiva para un goberno provincial que non pode seguir escudándose en anuncios mentres a provincia perde pulo e oportunidades.

Comparte éste artículo
No hay comentarios