O proxecto tamén contempla outras dúas intervencións en Erboedo que se realizarán a continuación
O Concello da Laracha ten en fase de execución o proxecto de mellora da rede viaria que afecta ás estradas dos núcleos de Novás e A Ferrulleira, ambos na parroquia de Coiro.
Nos dous casos as obras van dirixidas a favorecer a drenaxe coa mellora substancial da rede de recollida de augas pluviais. Así, están a ser instaladas novas tubaxes soterradas nos bordes da calzada, que a continuación serán acondicionados para aproveitar os sobreanchos e facilitar a circulación dos vehículos.
O alcalde, José Manuel López Varela, e o concelleiro de Obras Públicas e Urbanismo, Pablo Cambón, desprazáronse ao lugar das obras para supervisar as actuacións xunto a operarios da empresa adxudicataria, Canarga Construcciones.
Este proxecto está valorado nun total de 155.000 euros e tamén inclúe outras intervencións localizadas en Erboedo e que se realizarán posteriormente. Consistirán, neste caso, na mellora da superficie de rodadura dos vehículos e a sinalización vertical en estradas dos núcleos do Igrexario desa parroquia e de San Paio.