«Seguimos escoitando as opinións do tecido asociativo e da veciñanza da cidade para planificar mellor o traballo a executar», afirmou López
A concelleira de Participación do Concello de Lugo, Cristina López, mantivo unha xuntanza con Anjhara Gómez, presidenta da Asociación de Mulleres Empresarias de Lugo, que ten como obxectivo incorporar á muller de xeito activo na vida empresarial e profesional. Durante a xuntanza, López escoitou as demandas deste colectivo da man da súa presidenta, e aportou información sobre os proxectos máis inmediatos, e tamén os futuros, que se están a desenvolver dende a Área da que é responsable.
Cristina López mantivo esta xuntanza seguindo na liña de traballo da Tenencia de Alcaldía, coñecendo de primeira man as propostas e necesidades do tecido asociativo da cidade.
A concelleira afirmou que o Goberno atenderá ás propostas e solicitudes presentadas tanto polas asociacións como pola veciñanza de Lugo. «Traballamos para seguir impulsando a nosa cidade», afirmou Cristina López, que engadiu «desde a Tenencia de Alcaldía estudamos todas as propostas traballando sempre para mellorar todos os espazos públicos do noso concello».
