O PP de Ourense propón a Luis Menor como presidente da Deputación de Ourense. Así o trasladou o presidente do PPdeOU, Manuel Baltar, no marco da Xunta Directiva Provincial celebrada esta tarde na sede provincial ourensá do partido, e que estivo presidida polo líder provincial xunto ao presidente do PPdeG, Alfonso Rueda, e a secretaria xeral do PPdeG, Paula Prado.
Manuel Baltar definiu na súa intervención a Luis Menor como “un home traballador e dialogante, cun currículum formidable e que destaca na palabra máxica da Deputación: a cooperación”.
“Luis Menor ten as cualidades perfectas para liderar o goberno provincial, sendo perfectamente coñecedor da administración e das oportunidades do territorio”, sinalou o presidente do PPdeOU, que incidiu na “capacidade de diálogo e xestión” demostradas por Menor ao fronte da Dirección Xeral de Emerxencias ou, dende 2019, na Alcaldía do Pereiro de Aguiar, “revalidada o pasado 28 de maio cunha abrumadora maioría que fala do bo traballo desenvolvido a prol dos seus veciños”.
Rueda reivindica a unidade como elemento diferenciador do proxecto popular e destaca: “Mentres o PP sexa de Ourense, tamén o será de Galicia”
Pola súa banda, o presidente do PPdeG, Alfonso Rueda, agradecendo a xenerosidade de Manuel Baltar na súa decisión de dar un paso ao carón, pediu para Luis Menor o mesmo apoio, a mesma unidade e a mesma xenerosidade á fronte da Deputación que o PP de Ourense demostrou nestes anos.
Reivindicou a unidade como un elemento diferenciador do proxecto popular fronte a outras formacións políticas, remarcando que os proxectos unidos sempre teñen vantaxe sobre os que airean as súas discrepancias. Ao que engadiu que “mentres o Partido Popular sexa de Ourense, tamén o será de Galicia” e que “ambas cousas van unidas e sempre o estarán”, porque este é o partido que máis se parece e mellor defende ambas realidades.